१२ असोज, काठमाडौं । नेपाल राष्ट्र बैंकमा आयोजित एक कार्यक्रमका बैंकको संचालक समितिको ३१४ औं बैठकद्वारा सर्वसम्मत रुपमा अध्यक्षमा मनोनित भएका राजन सिंह भण्डारीलाई गभर्नर डा. चिरञ्जीवी नेपालले पद तथा गोपनियताको सपथ ग्रहण गराएका छन् ।
बैंकको स्थापनाकालदेखि पुस २०७५ सम्म प्रमुख कार्यकारी अधिकृतको रूपमा सफल कार्यकालपुरा गर्नु भएका भण्डारीले आगामी ४ बर्षको कार्यकालका लागि पदभार ग्रहण गरेका हुन् ।
सिटिजन्स बैंक इन्टरनेसनल लिमिटेडलेे आर्थिक वर्ष २०७५/७६ मा रु. ७४ अर्ब १३ करोड निक्षेप संकलन गरेको छ भने रु. ६५ अर्ब ७ करोड ऋण प्रवाह गरेको छ ।
बैंकले सोहि अवधिभित्र रु १ अर्ब ४६ करोड खुद मुनाफा आर्जन गरेको छ । बैंकले नेपाल राष्ट्र बैंकबाट ‘ख’ वर्गको इजाजत प्राप्त संस्था सहयोगी विकास बैंक लिमिटेडलाई प्राप्ति गर्ने गरी प्रारम्भिक समझदारी पत्रमा हस्ताक्षर गरी अन्य प्रक्रियागत कार्यहरु अगाडि बढिरहेको जनाएको छ ।
संघीयतालाई दह्रो र सहज बनाउन भूमिका निर्वाह गरेको बैंकले निकट भविष्यमा सातै प्रदेशमा थप १३ वटा शाखाहरु बिस्तार गर्ने योजना अगाडि सारेको छ ।