१ कात्तिक, काठमाडौं । बहुविवाहमा मिलापत्र गर्न दबाव दिएको प्रहरीले अन्ततः अनुसन्धान प्रक्रिया अघि बढाएको छ ।
त्रिभुवन विश्वविद्यालयअन्तर्गतको जनप्रशासन क्याम्पसका ढकाल थरका एक कर्मचारीले बहुविवाह गरेपछि उनकी जेठी श्रीमतीले प्रहरी वृत्त लैनचौरमा पुगेर बुधबार उजुरी दर्ता गरेकी थिइन् ।
पीडितको उजुरीपछि प्रहरीले कानूनी प्रक्रिया थाल्नुपर्ने भए पनि क्षेत्राधिकार नाघेर मिलापत्रका लागि दबाव दिएको थियो । त्यसबारे अनलाइनखबरमा समाचार प्रकाशित भएसँगै प्रहरीले लैनचौर वृत्तको हिरासतमा रहेका पीडित महिलाका श्रीमानकाे म्याद थपेर अनुसन्धान थालेको हो ।
महानगरीय प्रहरी आयुक्तको कार्यालय, रानीपोखरीका प्रमुख डीआईजी शैलेस थापा क्षेत्रीले जिल्ला अदालत, काठमाडौंको अनुमति लिएर ढकालको म्याद थप गरिएको र अभियोगबारे अनुसन्धान भइरहेको अनलाइनखबरलाई जानकारी दिए ।
‘पीडित महिलाको उजुरीपछि लैनचौर वृत्तको हिरासतमा रहेका ढकालमाथि अनुसन्धान गरिरहेका छौं’, डीआईजी थापा क्षेत्रीले अनलाइनखबरसँग भने ।