७ कात्तिक, काठमाडौं । सल्यानमा कर्तव्य ज्यान मुद्दाका आरोपी १३ वर्षपछि पक्राउ परेका छन् ।
तत्कालीन काभ्रा गाविस-३ आरुचौरका ३६ वर्षीय बमबहादुर बिकलाई १३ वर्षअघि हत्या गरेको आरोपमा सोही ठाउँका डिलबहादुर पुनलाई इलाका प्रहरी कार्यालय लुहामले काभ्राको रामबजारबाट पक्राउ गरेको हो ।
डिलबहादुरलगायत ७ जनाले ०६३ कात्तिक ५ गते राति ८ बजे बमबहादुरलाई घरबाट कुट्दै लिएर हत्या गरेको आरोप छ ।
बमबहादुरको शव भोलिपल्ट विहान १० बजे वरढुंगा खोलाको छेउमा भेटिएको थियो ।
पक्राउ परेका डिलबहादुरलाई इलाका प्रहरी कार्यालय लुहाममै राखेर थप अनुसन्धान भइरहेको जिल्ला प्रहरी कार्यालय सल्यानले जानकारी दिएको छ ।