२० कात्तिक, काठमाडौं । बहुप्रतिक्षित मेलम्ची खानेपानी आयोजनामा देखिएका समस्या समाधान हुने क्रममा रहेको खानेपानी तथा सरसफाई मन्त्री बीना मगरले बताएका छिन् । आयोनाको निरीक्षणका लागि बुधबार सिन्धुपाल्चोको मेलम्चीस्थित आयोजना स्थल पुगेकी मन्त्री मगरले सञ्चारकर्मीहरुसँग कुरा गर्दै सबै समस्याहरु चाँडै समाधान हुने बताइन् ।
आयोजना निर्माणको जिम्मा पाएको इटलियन कम्पनी सीएमसी काम छाडेर भागे पछि उत्पन्न भएका समस्या समाधान गर्न सरकार लागि परेको समेत बताइन् । उनले भनिन्, ‘कामदारको रकम भुक्तानी लगायतका समस्या छन्, यसका लागि सरकार गम्भीर छ ।’
स्थानीय कामदारको पारिश्रमिकबारे मन्त्रालयको सहसचिवको एउटा समिति बनिसकेकाले आवश्यक छानबिन थालिसकेको समेत उनले जानकारी दिइन् । उक्त समितिले कसको कति तिर्न बाँकी छ भनेर अध्ययन गर्ने र त्यसपछि सबैको रकम भुक्तानी हुने उनले बताइन् ।
‘आयोजना कहिले सम्पन्न हुन्छ रु’ भन्ने प्रश्नको उत्तर भने मन्त्री मगरले दिन चाहिनन् । उनले भनिन्, ‘अहिले नै कहिले बन्छ भनेर मिति नभनौं होला, उद्घाटन हुने तयारी भए पनि तपाईहरुलाई जानकारी दिन्छौं ।’
ठेकेदारले छाडेर जाँदा काममा ढिलाई भए पनि अब भने काम चाँडै हुनेमा आफू विस्वस्त रहेको उनले बताइन् । मेलम्ची खानेपानी आयोजनाका लागि आवश्यक पूर्वाधार र आगामी कार्ययोजना बनाइसकेकाले मन्त्रालय, आयोजनाको टिम एकजुट भएर लागिरहेको उनले बताइन् ।
आयोजनाको समय थपिँदै जानुले राम्रो सन्देश नदिएको भन्दै मन्त्री मगरले सिएमसीपछिको नयाँ ठेकेदार कम्पनीले उत्साहजनकरुपले काम गरेको दाबी समेत गरिन् । मन्त्रालयको विशेष टोलीले यसबारे गहिरो रुपमा केलाएर कामलाई अगाडि बढाइरहेको भन्दै मेलम्ची राजधानी नपुग्दा वर्षौंको प्यास मेटिन नपाएको भन्दै काम पूरा गरेरै छाड्ने प्रतिबद्धता जनाइन् ।
आयोजनाको अनुगमनका लागि प्रतिनिधि सभाको विकास तथा प्रविधि समिति मंगलबार नै मेलम्ची पुगेको थियो । आयोजनाको प्रगतिबारे अनुगमनका लागि पुगेको संसदीय समितिकी सभापति कल्याणी खड्कासहितको टोली र मन्त्री मगरबीच केहीबेर अनौपचारिक संवाद भएको थियो ।
