२९ मंसिर, काठमाडौं । नेपाल कम्युनिस्ट पार्टी (नेकपा) ले विधान संशोधनलाई केन्द्रीय कमिटीले अनुमोदन गरेपछि नेता बामदेव गौतमलाई उपाध्यक्ष बनाउने भएको छ ।
नेकपा स्थायी कमिटी बैठक आइतबार सुरु हुँदैछ, जसको एउटा एजेण्डा विधान संशोधन हो ।
विधान संशोधन गरेर उपाध्यक्ष पद सिर्जना गर्ने र गौतमलाई नियुक्त गर्ने दुई अध्यक्ष केपी शर्मा ओली र पुष्पकमल दाहाल प्रचण्डबीच सहमति भइसकेको छ । त्यसअनुसार सचिवालयले गरेको विधान संशोधन स्थायी कमिटीले अनुमोदन गर्नेछ ।
स्थायी कमिटीले विधान संशोधन गरेसँगै गौतमलाई उपाध्यक्ष बन्ने भए पनि पार्टीका केही नेताहरुले विरोध गरेका छन् । त्यसैले अब विधान संशोधनलाई केन्द्रीय कमिटीले अनुमोदन गरेपछि मात्र गौतमलाई उपाध्यक्ष बनाइने सचिवालयका एक सदस्यले बताए ।
उनकाअनुसार केन्द्रीय कमिटी बैठक पुस मसान्तभित्र बोलाउने सहमति भएको छ ।
