पापको भागीदार बन्दिनँ भन्दै प्रदेश राज्यमन्त्री झाले दिइन् राजीनामा

१४ माघ, जनकपुरधाम । प्रदेश २ सरकारकी भौतिक पूर्वाधार तथा विकास राज्यमन्त्री डा. डिम्पलकुमारी झाले राजीनामा दिएकी छन् । उनले मंगलबार राष्ट्रिय जनता पार्टी (राजपा) संसदीय दलको कार्यालयमार्फत मुख्यमन्त्री लालबाबु राउतलाई राजीनामा पत्र बुझाएकी हुन् ।

पत्रमा ‘राज्य मन्त्रीको हैसियत, पदीय मर्यादा र पदको प्रतिष्ठा जोगाउन लामो देखिको मेरो प्रयासका वावजुद पनि स्थिति अनुकुल हुने अवस्था नभएका’ राजीनामा दिएको उल्लेख छ ।

‘पापको भागीदार बन्दिन’

राज्यमन्त्री झाले मुख्यमन्त्री र आर्थिकमामला मन्त्रीसँग असन्तुष्ट भएर राजीनामा दिएकी हुन् । प्रदेश सरकारले आफ्नै गृह जिल्ला (रौतहट) मा कार्यक्रम गर्दा समेत आफूलाई जानकारी नदिएको उनकेा गुनासो गरिन् ।

संयुक्त सरकार भएपनि एउटै पार्टीको सरकार जसरी सञ्चालन गरेको, आफूले अघि सारेको जुनसुकै योजना अर्थ मन्त्रालयले रोकेको झाको गुनासो छ । राजीनामापछि अनलाइनखबरलाई संक्षिप्त प्रतिक्रिया दिँदै उनले भनिन्, ‘डेढ वर्षदेखि निरन्तर प्रयत्न गर्दा पनि पदीय मर्यादा जोगाउन नसक्ने अवस्था आएपछि पापको भागीदार किन बन्ने भनेर राजीनामा दिएँ ।’