१९ फागुन, काठमाडौं । नेपाल भ्रमण वर्ष २०२०को दोस्रो महिनामा पनि पर्यटक आगमन खस्किएको छ । अध्यागमन विभागको तथ्यांक अनुसार फेब्रुअरी महिनामा ०.९९ प्रतिशतले पर्यटक आगमन ओरालो लागेको छ ।
सन् २०१९ को दोस्रो महिनामा १ लाख २ हजार ४ सय २३ जना पर्यटक नेपाल आएका थिए । तर, फेब्रुअरी २०२० मा कूल १ लाख १ हजार ४ सय जना पर्यटक नेपाल आएका छन् ।
जनवरी महिनामा पनि पर्यटक आगमन १ हजार ५८७ जनाले खस्किएको थियो । कोरोना भाइरसको संक्रमणले चीनसहितका देशहरु प्रभावित बनेपछि पर्यटक आगमन खस्किन पुगेको पर्यटन बोर्डले जनाएको छ ।
चिनियाँ पर्यटक उल्लेख्य घटे
कोरोना प्रभावित मुलुक चीनबाट भने नेपाल आउने पर्यटक उल्लेख्य घटेका छन् । एक महिनाको अवधिमा मात्र ३ हजार २ सय ८५ जना चिनियाँ पर्यटक नेपाल आएका छन् ।
यी मध्ये पनि अधिकांश कामदार, प्रशासनिक तथा कूटनीतिक कामका लागि आएका व्यक्तिहरु धेरै छन् ।
सन् २०१९ मा १४ हजार १ सय ६१ जना चिनियाँ पर्यटक नेपाल आएका थिए । चीनबाट पर्यटक आगमन उल्लेख्य घट्दा समग्र पर्यटक आगमन प्रभावित भएको छ ।
७७ हजार हवाई यात्रु
फेब्रुअरीमा हवाई यात्राबाट ७७ हजार ६४ जना पर्यटक आएका छन् । गत वर्षभन्दा यो वर्ष हवाई यात्रु केही बढेका छन् । स्थलमार्गबाट भने २४ हजार ३ सय ३६ जना पर्यटक नेपाल आएको अध्यागमन विभागलाई उद्धृत गर्दै पर्यटन बोर्डले जानकारी दिएको छ ।
यो महिनामा दक्षिण एसियाली क्षेत्रबाट पर्यटक आगमन बढेको छ । अन्य क्षेत्रबाट आउने पर्यटक घटेका छन् ।
समग्रमा पर्यटक आगमन खस्किएपनि म्यानमार, श्रीलंका र थाइल्याण्डबाट आउने पर्यटक बढेका छन् । उद्घाटनमा म्यानमारबाट पर्यटनमन्त्रीको संयोजकत्वमा प्रतिनिधित्व भएको थियो । यसबाट नेपाल आउने म्यानमारका पर्यटकमा सकारात्मक प्रभाव देखिएको दावी सरकारको छ ।
म्यानमार, श्रीलंका र थाइल्याण्डबाट अघिल्लो वर्षको यसै महिनाको तुलनामा क्रमशः ४५९५.६, ११२६.८ र ५६५.५ प्रतिशतले वृद्धि भएको छ । म्यानमारबाट फेब्रुअरी २०२० मा ५ हजार ३ सय ५३ जना पर्यटक नेपाल आएका छन् । सन् २०१९ को यो महिनामा १ सय १४ जना मात्र म्यानमारबाट पर्यटक नेपाल आएका थिए ।
नेपाल पर्यटन बोर्डका प्रवन्धक मणिराज लामिछानेका अनुसार बौद्धमार्गी गन्तब्यमा गरिएको प्रवर्द्धन र यसबीचमा भएका उच्चस्तरीय भ्रमणले पर्यटन आगमनमा सकारात्मक प्रभाव परेको प्रतिक्रिया दिए ।
श्रीलंकाबाट यस महिना ३ हजार २ सय २ जना पर्यटक नेपाल आएका छन् । गत वर्ष यो महिनामा मात्र २ सय ६१ जना पर्यटक आएका थिए । थाइल्याण्डबाट यो महिनामा ५ हजार ८ सय २ जना पर्यटक आएका छन् । गत वर्ष ८ सय ७२ जना मात्र पर्यटक नेपाल आएका थिए ।
फेब्रुअरी २०२० मा कुन मुलुकबाट कति आए ?
मुलुक | सन् २०२० फेब्रुअरी | सन २०१९ फेब्रुअरी | परिवर्तन |
---|---|---|---|
भारत | १६५५८ | १७६१५ | -६ प्रतिशत |
चीन | ३२८५ | १४१६१ | -७६.८ प्रतिशत |
अमेरिका | ६४४२ | ६२२६ | ३.५ प्रतिशत |
थाइल्याण्ड | ५८०२ | ८७२ | ५६५.४ प्रतिशत |
म्यानमार | ५३५३ | ११४ | ४५९५.६ प्रतिशत |
बेलायत | ४७३२ | ४८३५ | -२.१ प्रतिशत |
श्रीलंका | ३२०२ | २६१ | ११२६.८ प्रतिशत |