काठमाडौं । एपीएफको दबदबा तोड्दै नेपाल पुलिस क्लबे छैटौं संस्करणको प्रधानमन्त्री कप अन्तर्राष्ट्रिय आमन्त्रण महिला भलिबल प्रतियोगिताको उपाधि जितेको छ ।
नेपालगञ्ज कर्भडहलमा बुधबार भएको फाइनलमा साविक विजेता समेत रहेको एपीएफलाई ३-० को सेटमा पराजित गर्दै पुलिस च्याम्पियन बनेको हो ।
टोलीको मुख्य स्पाइकर सरस्वती चौधरी र नेविका चौधरी घाइते भएकाले उनीहरु विनानै कोर्टमा उत्रेको एपीएफलाई पुलिसले सोझो सेटमा हराएको हो ।
विभागीय डर्बी फाइनलमा पुलिसले एपीएफलाई २५-१६, २५-१७ , २५-१८ को सेटमा पराजित गर्यो ।
एपीएफ १७ महिनापछि फाइनलमा पराजित भएको हो । गत वर्ष असोजमा काठमाडौंमा आदि अबाधी भलिबलको उपाधि जितेपछि एपीएफ अहिले फाइनलमा पराजित भएको हो । यस सिजन भएको अन्य प्रतियोगितामा भने एपीएफले पुलिसलाई पराजित गरेको थियो ।
पुलिसले एपीएफसँग हारको शृखंला समेत तोडेको छ । काठमाडौंमा भएको ढोपाटन डबल लिग महिला भलिबलमा एपीएफले पुलिसलाई दुई पटक हराएको थियो । यस्तै पर्वतमा भएको दिदीबहिनी कपमा पनि एपीएफले जित हात पारेको थियो ।
बुधबार नै भएको तेस्रो स्थानको लागि भएको खेलमा अर्को विभागीय टोली त्रिभुवन आर्मीले खेलमा होङग्वान्जी न्यु डाईमण्ड स्पोर्ट्स क्लबलाई ३-० को सेटमा पराजित गरेको छ । आर्मील न्यु डायमण्डलाई २५–२१, २५–२०, २५–२० को सेटमा हराउँदै तेस्रो भएको हो ।
उपाधिसँगै च्याम्पियन पुलिसले २ लाख प्राप्त गर्दा एपीएफले १ लाखमा चित्त बुझायो । तेस्रो भएको आर्मीले ५० हजार प्राप्त गरेको छ ।