२३ फागुन, काठमाडौं । संयुक्त राष्ट्र संघको अगुवाइमा द्वन्द्वग्रस्त विभिन्न मुलुकमा शान्ति स्थापनार्थ धेरै सुरक्षाकर्मी पठाउने देशको सूचीमा नेपाल चौथो स्थानमा उक्लिएको छ ।
नेपालले अघिल्लोपटकको तुलनामा एक स्थान सुधार गरेको हो । शान्ति स्थापनार्थ विभिन्न १ सय २२ देशले सुरक्षाकर्मी पठाउने गरेका छन् ।
पछिल्लो तथ्याङ्कअनुसार विभिन्न १२ द्वन्द्वग्रस्त मुलुकमा नेपालका ५ हजार ६ सय ५८ सुरक्षाकर्मी तैनाथ छन् । जसमध्ये नेपाली सेना ५ हजार ९६ र नेपाल प्रहरी तथा शसस्त्र प्रहरी गरी ५ सय ६२ जना छन्।
नेपालले पहिलो पटक सन् १९५८ मा ५ जना सैनिकलाई पर्यवेक्षकको रुपमा युनाइटेड नेशन्स् अब्जरभेसन ग्रुप इन लेबनान(UNOGIL) मिशनमा पठाएको थियो ।
अहिलेसम्म १ लाख २९ हजार ८ सय ९९ जना सैनिकहरुले शान्ति मिशनमा सहभागिता जनाइसकेका छन् । जसमध्ये १ हजार ४ सय १ जना महिला सैनिक छन् । हाल १ सय ८१ जना महिला सैनिक मिशनमा रहेको सेनाले जनाएको छ ।
