६ चैत, सप्तरी । सप्तरीको रुपनी गाउँपालिका ३ कटैयामा १४ बर्षीय अकलेश माली गत फागुन ६ गते राति खाना खाएर एकैछिनमा आउँछु भनी घरबाट निस्केका थिए । तर उनी फर्किएर आएनन् । खोजी गर्दा भोलिपल्ट विहान उनको शव फेला प¥यो ।
बुबा शिवनारायणकाअनुसार घरबाट निस्कनु अघि उनी मोवाइल चलाइरहेका थिए । कसैको फोन आएपछि घरबाट गएका थिए । ‘हजुरआमाको कोठामा बसिरहेको उ केहीबेरमै आउँछु भनेर गएको रहेछ । तर फर्केर आएन’ उनले भने ।
उनी आपँको रुखमा साडीको पासो लगाएको अवस्थामा भेटिएका हुन् । उनको दुवै खुट्टा भुइँमा छोइएको अवस्थामा देखिएको पिता शिवनारायणको भनाइ छ ।
परिवारकाअनुसार गाउँकै एक किशोरीसँग विगत केही महिनादेखि अकलेशको धेरै पटक एसएमएस आदान प्रदान भएको थियो । घटना भएको दिन पनि उनहिरुबीच धेरै कुराकानी भएको अकलेशको परिवारजनको भनाइ छ ।
अकलेश किशोरीकै अनुरोधमा घरबाट राति १० बजे निस्किएको र गाउँकै एक जनाको खाली घरमा बसी गफ गरिरहेको अवस्थामा किशोरीका परिवारका दीपककुमार मण्डल आएर छोरालाई कुटपिट गर्दै आँपको बगैचासम्म लगेको भिडियो आफूसँग रहेको शिवनारायणले बताए । ‘किशोरीले नै अकलेशलाई आफ्नै मान्छेले कुटपिट गर्दै लिएर गएको जानकारी गराएका छन्’ अकलेशका बुबा शिवनारायणले भने, ‘मेरो छोराको आत्महत्या नभई हत्या गरिएको हो ।’
