Comments Add Comment

ग्यासको विकल्प खोज्नै पर्‍यो !

१९ चैत, काठमाडौं । नेपाल खाद्य संस्थानका कर्मचारीलाई यतिबेला भ्याइनभ्याइ छ । धेरैजसो दिन गफ गरेर काट्नु परेका कर्मचारीलाई अहिले विद्युतीय चुल्हो (इन्डक्सन) किन्न आउनेहरुले काममा व्यस्त बनाएका छन् ।

स्थलगत रिपोर्टिङका लागि मंगलबार संस्थानको थापाथली कार्यालय पुग्दा कोरोना भाइरस संक्रमणबाट जोगिन सतर्कता पनि राम्रोसंग अपनाइएको थियो । काम भएकाले मात्र कार्यालय परिसरमा प्रवेश पाउने । प्रवेश पाएकाहरुले पनि करिब चार फिटको दूरी कायम गरेर लाइन लाग्न पर्ने । त्यसका लागि सेतो रंगले गोलाकार रेखांकन गरिएको रहेछ ।

पालो आएपछि एउटा इन्डक्सनका लागि चार हजारको विल काटेका ग्राहकबाट कर्मचारीले पैसा पनि सिधै नलिने । विल र पैसा नाङ्गलोमा राखेर लेनदेन हुने । एकै व्यक्तिले धेरै चुल्हो लैजान थालेपछि संस्थानले एक जनालाई एउटा मात्र दिन थालेको त्यहाँ खटिएकी एक कर्मचारी बताइन् ।

संस्थानले दाल, चामल लगायत खाद्य पनि बेचिरहेको छ । अहिलेको आकर्षण चाहिँ इन्डक्सन नै भएको उनले बताइन् । उनकाअनुसार, लकडाउन भएको आठौं दिनसम्म छ हजार इन्डक्सन बिक्री भइसक्यो ।

इन्डक्सन किन्न आएका सबैको एउटै भनाइ छ- भर नभएको ग्यासको विकल्प खोज्दै पर्‍यो । ‘चलाइरहेको ग्यास सकिएपछि पाइने भरोसा सरकारले दिन सकेन’ ललितपुर, धापाखेलका विशाल महर्जनले भने, ‘इनडक्सन चुल्हो भयो भने भोकै बस्नु पर्दैन भनेर किन्न आएको ।’

त्यस्तै काठमाडौं, टोखाका दधिराम लामिछाने भन्छन्, ‘अब त विद्युतकै समय हो, ग्यासको त भरै छैन ।’

हुन पनि, ग्यास अभाव हुने संकेत सरकारले दिएको छ । भारतमा ग्यासको उत्पादन घटेपछि नेपालमा सरकारले आधा सिलिण्डर बिक्री गर्ने तयारी गरेको छ । यसको प्रभाव इन्डक्सन बिक्रीमा परेको संस्थानका अधिकारीहरु बताउँछन् ।

तस्वीर र भिडियाे– आर्यन धिमाल/अनलाइनखबर

यो खबर पढेर तपाईलाई कस्तो महसुस भयो ?

ट्रेन्डिङ

Advertisment