२६ चैत, काठमाडौं । युरोपेली मुलुकले धमाधम आफ्ना नागरिकलाई नेपालबाट फिर्ता लगिरहेका छन् । यसैक्रममा बुधबार दुई चार्टर्ड उडान भएका छन् ।
त्रिभुवन विमानस्थल कार्यालयका अनुसार बेलायतले टीटान एयरवेजको जहाजबाट दुई सय ५२ जना नागरिक बोकेर उडेको छ । यो जहाज कतारको दोहामा इन्धन भरेर लण्डनतर्फ लाग्नेछ । यो बेलायती वायुसेवा कम्पनी हो ।
बुधबार नै जर्मनीले समेत कतार एयरवेजमार्फत थप नागरिक फिर्ता लगेको छ। जर्मनीले चार्टर्ड गरेको यो जहाजमा दुई सय ८२ यात्रु, दुई नाबालक नेपालबाट उडेका छन् ।
उनीहरु धेरैजसो जर्मन नागरिक र केही युरोपेली युनियनभित्रका नागरिक रहेको समेत बताइएको छ । नेपालमा अन्तराष्ट्रिय हवाई उडान प्रतिबन्धको मिति निरन्तर बढेसँगै देशहरुले नेपालबाट धमाधम आफ्ना नागरिक फिर्ता लगिरहेका छन् ।
यस क्रममा देशहरुले टिकटको मूल्य यात्रु आफैँले आफैँले तिर्नेगरी चार्टर्ड उडानको व्यवस्थापन गरिरहेका छन् ।
यसैबीच, क्यानडाले भने ११ अप्रिलमा आफ्ना नागरिकलाई नेपालबाट फिर्ता लैजाने भएको छ । त्यसका लागि चार्टर्ड उडानको तयारी गरिएको छ ।
