१ वैशाख, काठमाडौं । भर्चुअल संसदबारे छलफल गर्न संघीय संसदको कार्यव्यवस्था परामर्श समितिको वैठक आह्वान गरिएको छ ।
राष्ट्रियसभाका अध्यक्ष गणेशप्रसाद तिमिल्सिना र प्रतिनिधिसभाको अर्थ समितिले भर्चुअल बैठकको अभ्यास गरिसकेका बेला भर्चुअल संसदको विषयमा छलफल गर्न कार्यव्यवस्था परामर्श समितिको वैठक बोलाइएको संसद सचिवालयले जनाएको छ ।
बैठक मंगलबार दिउँसो १ बजेका लागि बोलाइएको हो ।
हाल संसदको अधिवेशन अन्त्य भएको छ । संसद् अधिवेशन अन्त्य भएको अवस्थामा पनि संसदीय विषयगत समितिका बैठकहरू बस्न सक्छन् । तर, कोरोनाको त्रासका कारण भौतिक उपस्थितिमा बैठक गर्न नसक्ने भएकाले संसदीय गतिविधिमा पनि भर्चुअल बैठकको अभ्यास हुन थालेको छ ।
तर यसको वैधानिकतामा कतिपयले प्रश्न उठाइरहेका छन् । यी समग्र विषयमा छलफल गर्नेगरी कार्यव्यवस्था परामर्श समितिको बैठक बोलाइएको संघीय संसद् सचिवालयले जनाएको छ ।