मनकारी खेलाडी : पुरस्कारको रकमबाट विपन्नलाई सहयोग गर्ने चाहना

६ वैशाख, काठमाडौं । उसु खेलाडी किरण साउदले १३ औं दक्षिण एसियाली खेलकुद प्रतियोगिता (साग) मा पदक जितेवापत सरकारले दिएको पुरस्कारको केही अंश कोरोना महामारीका कारण समस्यामा परेकालाई सहयोग गर्ने बताएका छन् ।

‘मैले सागमा कास्य पदक जितेर ३ लाख पुरस्कार पाएको छु । अहिले पैसा पाएको भन्दा पनि देशको अवस्था हेरेर एकदमै दुखी छु’ किरणले अनलाइनखबरसंग भने ‘अलिकति भए पनि सहयोग गर्न चाहन्छु ।’

उनले कोरोना रोकथाम र महामारीका कारण समस्यामा परेकालाई व्यक्तिगत रुपमै सहयोग गर्ने बताएका छन् । ‘दीनदुखीहरु कतिपयको अहिले कठिन अवस्था छ उनीहरुलाई सहयोग गर्न मन लाग्छ । सामाजिक सञ्जालमा दुख पाइरहेको हरुको बारेमा हेर्दा देख्दा झन् दुख लाग्छ’ उनले भने ।

उनले पुरस्कारको रकममध्ये ५० हजार रुपैयाँ कोरोना महामारी र लकडाउनका कारण समस्यामा परेकाहरुको सहयोगमा खर्च गर्ने बताएका छन् ।
नेपाली सेनाको जागिरे २७ वर्षीय किरण हाल ललितपुरको लगनखेलस्थित सैनिक शारीरिक तालिम तथा खेलकुद केन्द्रमा छन् ।

किरणले उसु खेल्न थालेको ६ वर्ष भयो । उनी ५ वर्षदेखि नेपाली सेनामा कार्यरत छन् । यस्तै चार वर्षदेखि उसुको राष्ट्रिय टिममा समेत छन् । १२ औं सागमा उनको तौल समूहको प्रतिस्पर्धा थिएन । १३ औं सागमा घरेलु भूमिमा उनले स्वर्ण जित्ने लक्ष्य राखेका थिए । चीनमा भएको १५ औं वल्र्ड च्याम्पियनसिपमा पनि उनले राम्रो प्रदर्शन गरेका थिए ।

तर खेल्ने क्रममै घाइते भएपछि कास्य पदकमा चित्त बुझाउनुपरेको थियो । श्रीलंका खेलाडीविरुद्ध खेल्दा उनको लिगामेन्ट च्यातिएपछि उनको सपना अधुरो रह्यो । ‘३० सेकेण्डले गर्दा मै कास्यमै सिमित भएँ । ३० सेकेण्डमा उठ्न सकेको भए मैले रजत जित्थेँ’ उनले भने ।

किरणको घर कन्चनपुर हो । घरमा आमा भाउजु र दुई भतिज छन् । ‘दाइ भारतमा हुनुहुनथ्यो। उनै लकडाउनले गर्दा आउन पाउनुभएन । मेरो आमाले पनि सहयोग गर्दा समर्थन गर्नुहुन्छ’ किरणले भने ।

‘हामी निम्न वर्गकै हौँ तर सहयोग गर्न मन लाग्छ किनकी मैले पनि धेरै दुख गरेको छु । अरको बारेमा थाहा छ त्यसैले सहयोग गर्न मन लाग्छ’ किरणले थपे ।
किरणसहित ३० जना हाल लगनखेलमै छन् । बाहिर निस्कन मिल्दैन । तर उनले त्यहीँबाट सहयोग गर्ने बताएका छन् ।

‘अहिले बाहिर निस्कन मिल्दैन भित्रै छु । कसैलाई गाह्रो परेको छ भने मलाई सम्पर्क गर्न सक्नुहुन्छ मेरो मोबाइल नम्बरमा ९८४९९९५४४२’ उनले भिडियोमार्फत अपिल समेत गरेका छन् ‘म सक्ने सहयोग गर्नेछु ।’