१४ वैशाख, काठमाडौं । कोरोना भाइरसका कारण अमेरिका र युरोप सबैभन्दा बढी प्रभवित छन्, तर तीबाहेक ल्याटिन अमेरिकाका केही देशमा पनि हाल यो भाइरस तीब्र रुपमा फैलिरहेको छ ।
ल्याटिन अमेरिकी देश इक्वेडरमा २ मार्चमा जम्मा ६ जनामा देखिएको यो भाइरसको सक्रमण अहिले बढेर २२ हजार ७ सय ९१ पुगेको छ । त्यहाँका सरकारी अधिकारीका अनुसार मृतक संख्या अहिलेसम्म ९०० छ, तर यो संख्या अझ बढी हुन सक्ने अनुमान गरिएको छ ।
ब्राजिलमा २६ फेब्रुअरीमा संक्रमणको पहिलो केस भेटिएको थियो । अहिले यहाँ संक्रमितको संख्या ५५ हजार पार गरेको छ भने मृतक संख्या ३ हजार ७ सय ६२ पुगेको छ ।
टर्कीमा ११ मार्चमा पहिलो संक्रमित भेटिएको थियो, त्यसयता अहिलेसम्म १ लाख ७ हजार ७ सय ७३ जना सक्रमित भइसकेका छन् । अहिले कोरोना भाइरसका कारण अति प्रभावित सात देशमा टर्की पनि परिसकेको छ । यहाँ मृतक संख्या २ हजार ७ सय ६ रहेको छ ।
रुसमा २८ मार्चसम्म जम्मा १ हजार संक्रमित थिए । तर अहिले बढेर ७४ हजार ५ सय ८८ पुगेको छ । यहाँ मृतक संख्या ६ सय ८१ पुगेको छ ।
जम्मा १६ दिनमा एक लाखको मृत्यु
चीनको वुहानमा ११ जनवरीमा पहिलो पटक मानिसको मृत्यु भएपछि कोरोना भाइरसका कारण ९० दिनभित्र विश्वभर एक लाख मानिसको मृत्यु भएको थियो । अर्को एक लाख जनाको मृत्यु हुन जम्मा १६ दिन लाग्यो ।
युरोपको बेल्जियममा संक्रमित संख्याको तुलनामा मृतक संख्या अत्यधिक रहेको छ । बेल्जियममा १ लाख संक्रमितमा ६ जनाको मृत्यु भएको छ । स्पेनमा यस्तो दर ४.६ जना र अमेरिकामा १.६ जना रहेको छ ।
कोरोना भाइरसका कारण अहिलेसम्म एसियामा करिब ७ हजार, ल्याटिन अमेरिकामा पनि ७ हजार, मध्यपूर्वमा ८ हजार ८ सय र अफ्रिकामा १ हजार ३ सय ५० जनाको मृत्यु भएको छ ।
स्रोत : बीबीसी हिन्दी
