२१ वैशाख, काठमाडौं । कोभिड १९ सँग सम्बन्धित स्वास्थ्य सामाग्रीको शंकास्पद भण्डारमा वाणिज्य विभागले सिल गरेको छ ।
काठमाडौंको बबरमहलमा रहेको ई-ज्ञानकुञ्जको कार्यालयमा राखिएको ६३ कार्टुन व्यक्तिगत सुरक्षा उपकरण (पीपीई), पञ्जा, चस्मा लगायतको गोदाममा सिल गरिएको वाणिज्य विभागले जनाएको छ ।
बालाजु क्षेत्रमा बिक्री पसल रहेको आँखु इन्टरप्राईजेजको भण्डारण अरु नै प्रयोजनमा खोलिएको कार्यालयमा पाईएपछि सिल गरिएको विभागका अनुगमन शाखा निर्देशक सागर मिश्रले जानकारी दिए ।
‘कारोबार क्षेत्रभन्दा फरक ठाउँमा शंकास्पद भण्डारण पाइयो, सामान सिल गरेका छौँ, अनुसन्धान हुँदै छ,’ निर्देशक मिश्रले भने ।
स्वास्थ्य सामाग्रीको भण्डारण सूचना प्रविधि सम्बद्ध कार्यालयमा पाइएपछि सम्बन्धित कम्पनीसँग थप कागज पत्र मगाएको पनि विभागले जनाएको छ ।
साढे दुई सय फर्म अनुगमन
वाणिज्य विभागले चैतदेखि वैशाख तेस्रो हप्तासम्म अनुचित व्यपारिक क्रियाकलापमा संलग्न ७० वटा फर्मलाई जारीवाना तथा कारबाही गरेको छ । यो अवधिमा विभागले जम्मा २४५ वटा फर्मको अनुगमन गरेको विभागका अनुगमन निर्देशक सागर मिश्रले बताए ।
अनुगमन क्रममा खाद्यन्न, तरकारी, ग्यास, स्वास्थ्य सामाग्री लगायतमा बढी मूल्य लिने, मूल्य सूची नराख्ने, बिल बिजक जारी नर्गो त्यस्ता फर्म तथा सुप्पर मार्केटलाई कारबाही गरिएको थियो ।
अनुगमन अवधिमा डेढ महिनामै ७० फर्मबाट विभागले ७० लाख ६५ हजार जरिवाना तिरएको छ ।
विभागको छड्केमा पर्नेहरुमा खाद्यन्न बिक्री गर्ने २३, ग्यास बिक्री गर्ने ६, औषधि बिक्री गर्ने पाँच, ग्यास बिक्री गर्ने पाँच, अनलाइन कारोबार गर्ने दुई र खाद्यववस्तु उत्पादन गर्ने एउटा उद्योग तथा र्फमहरु कारवाहीमा परेका छन् ।
नौ वटा सर्जिकल पसल, पाँच वटा श्रगांर पसल, दुई-दुईवटा सुपर मार्केट, फलफूल पसल र मार्ट, एक-एक वटा पेट्रोल पम्प र माछा पसल पनि कारवाहीमा परेका थिए ।
विभागले अनुगमन क्रममा एक सय नौवटा र्फममा अनुचित कारोबार नभइको पाएको थियो भने ६० वटा र्फमलाई सुधार गर्न निर्देशन दिएको जनाएको छ ।
यस्तै दुई वटा र्फमको वस्तु नमूना संकलन गरेर विभागमा ल्याएर अनुसन्धान थालिएको छ भने ४ वटा र्फमलाई स्पष्टीकरण सोधिएको छ ।
