२५ वैशाख, बाँके । जिल्लाको कोहलपुरस्थित सामुदायिक वनमा शिकारीले थापेको पासोमा परी एक जना गम्भीर घाइते भएका छन् ।
कोहलपुर नगरपालिका –७, लखनाका ठाकुर थारू गएराति चोर शिकारीले थापेको पासोमा परी घाइते भएको इलाका प्रहरी कार्यालय, कोहलपुरका प्रमुख प्रहरी नायब उपरीक्षक कुलदीप चन्दले जानकारी दिए ।
उनका अनुसार, गोठ बनाउनका लागि स्थानीय मितेरी सामुदायिक वनमा काठ काट्न चार जनासहित पुगेका उनी चोर शिकारीले थापेको एकनाले बन्दूकको पासोमा परेका हुन् ।
पासो थापेको बन्दुक पड्किँदा थारूको पुठ छेडिएको छ । घाइते थारूको अहिले शिक्षण अस्पताल कोहलपुरमा उपचार भइरहेको छ ।
सामुदायिक वनमा रहेका मृग मार्न शिकारीले बन्दुकको पासो थापेको हुन सक्ने प्रहरीको अनुमान छ ।
