३० वैशाख, काठमाडौं । पूर्वप्रधानमन्त्री एवं जनता समाजवादी पार्टीका नेता डा. बाबुराम भट्टराई नेत्रविक्रम चन्द ‘विप्लव’ नेतृत्वको नेकपाका केन्द्रीय सदस्य एवं प्रचार विभाग प्रमुख अनिल शर्मा विरहीको स्वास्थ्य स्थितिबारे जानकारी लिएका छन् ।
नेता विरही चितवनको भरतपुर अस्पतालमा उपचाररत छन् । गत वैशाख २३ गते घरमै लडेर घाइते भएका विरहीलाई प्रहरीले अस्पतालबाट पक्रेको थियो। उनको प्रहरी निगरानीमा उपचार भइरहेको जनाइएको छ ।
डा. भट्टराईले मंगलबार टेलिफोनमार्फत विरहीको स्वास्थ्यस्थितिबारे जानकारी लिएको उनको सचिवालयले जनाएको छ ।
यसैगरी, कानुन व्यवसायीहरु कपिलचन्द्र पोखरेल, गंगा कोइराला, नारायण गिरी, गोपीलाल देवकोटाले पनि मंगलबार अस्पतालमा पुगेर विरहीको स्वास्थ्यअवस्था बारे जानकारी लिएका छन् । साथसाथै उनीहरुले कानुनी परामर्शसमेत गरेका जनाइएको छ ।
विरहीको परिवारले भने अस्पतालमा घण्टौंसम्म उपचार नगरी राखेको गुनासो गरेका छन् ।
