१८ जेठ, काठमाडौं । नेपाली कांग्रेसका सांसद जितेन्द्रनारायण देवले आगामी आर्थिक वर्षमा ७ प्रतिशतले आर्थिक वृद्धि हासिल गर्न सरकारलाई चुनौती दिएका छन् ।
राष्ट्रियसभाको आइतबारको बैठकमा सांसद देवले आगामी आर्थिक वर्षमा ७ प्रतिशतले आर्थिक वृद्धि भए राजनीति नै त्याग्ने दावी गरे ।
‘अहिले सबभन्दा ठूलो च्यालेन्ज भनेको देशमा इकोनोमिक क्रियाकलापलाई अगाडि बढाउनुपर्ने हो, एउटा आर्थिक पुनरुत्थानको कामलाई अगाडि बढाउनुपर्ने हो मेरो चुनौती छ नेपाल सरकार र अर्थमन्त्रीलाई यदि ७ प्रतिशतको जीडीपीको ग्रोथ रेट २०७७/०७८ मा आयो भने म राजनीति छोडिदिन्छु ।’
बैठकमा सांसद देवले बजेटको कुन वर्गका लागि आएको हो भन्दै प्रश्न गर्नुभयो । ‘यो समाजको सुकिला मुकिलाहरुको मात्रै बजेट हो कि, यो समाजको सुट र टाई लगाउने वर्गको मात्रै बजेट हो कि यो समाजमा मुस्ताङी स्याउ जस्तो रातो रातो गाला भएको हरुको मात्रै बजेट हो कि ?’ उनले भने ।
बजेटमा सीमान्तकृत, विपन्न र गरिब नागरिकलाई नसमेटिएको उनले बताए ।
धेरै ठाउँमा जनताहरु खाना नपाएर भोकले ज्यान गुमाउनुपरेको उल्लेख गर्दै नेता देवले भने ‘लकडाउनका कारण आज सप्तरी जिल्लामा मलरसदाले खान नपाएर भोकभोकै प्राण त्याग गर्यो । खान नपाएर भोक भोकै कीर्तिपुरको रोडमा सूर्यबहादुर तामाङ दाम्लो र डोको छातीमा राखेर प्राण त्याग गर्यो । आज हजारौं लाखौं मलर सदा र सूर्यबहादुर तामाङ यो मुलुकमा छन् । त्यसको लागि राहत, त्यसको लागि सहयोग, त्यसको लागि बजेट खोई ? कहाँ बजेट विनियोजन भएको छ त्यसको लागि । के त्यसको लागि बजेट विनियोजन हुनुहुँदैन थियो ?’
उनले सरकारलाई गरिबमारा बजेट ल्याएको आरोप लगाए । लकडाउनको कारण आपूर्ति शून्य भएकाले कलोबजारी र विचौलियाको संख्या बढेको र कृतिम अभाव तथा महंगीलाई रोक्ने खालको बजेट नआएको बताए ।
कोरोना संक्रमणको जोखिम बढ्दै जाँदा पनि सरकारले ६ अर्ब मात्रै बजेट छुट्याएको भन्दै देवले आपत्ति जनाए । पीसीआर परीक्षण गर्नसमेत नपुग्ने बजेट आएको उल्लेख गर्दै उनले कोरोना रोकथामका लागि अझै बजेट बढाउनुपर्ने बताए ।
कृषि क्षेत्रमा गतवर्ष भन्दा केही बजेट बढाइएको भए पनि मलखादमा ५ प्रतिशत र विउविजनमा १५ प्रतिशत कर बढाएर कृषि क्रान्ति नहुने बताए ।
