४ असार, काठमाडौं । रुसमा कोरोना भाइरस (कोभिड–१९) का नयाँ संक्रमितको संख्या घट्न थालेको छ ।
रुसले बिहीबार सार्वजनिक गरेको तथ्यांक अनुसार रुसमा पछिल्लो २४ घण्टामा नयाँ संक्रमितको संख्या ६ सातायताकै सबैभन्दा कम देखिएको छ । पछिल्लो २४ घण्टामा रुसमा सात हजार ७९० नयाँ संक्रमित फेला परेका छन् । यसअघि अघिल्लो दिन रुसमा सात हजार ८४३ नयाँ संक्रमित फेला परेका थिए । यो संख्या गत अप्रिल ३० यताकै कम थियो ।
रुसमा कोरोना भाइरसका संक्रमितको संख्या पाँच लाख ६१ हजार ९१ पुगेको छ । त्यस्तै पछिल्लो २४ घण्टामा रुसमा कोरोना भाइरसबाट १८२ जनाको मृत्यु भएको छ । यससँगै कोरोना भाइरसबाट मृत्यु हुनेको संख्या पनि सात हजार ६६० पुगेको छ ।
रुस संक्रमित संख्याको आधारमा कोरोना भाइरसबाट तेस्रो बढी प्रभावित मुलुक हो । कोरोना भाइरसबाट सबैभन्दा प्रभावित मुलुकको सूचीमा पहिलो स्थानमा अमेरिका र दोस्रोमा ब्राजिल छन् ।
स्रोत : अलजजिरा
