१७ असार, काठमाडौं । बार्सिलोना तथा अर्जेन्टिनाका कप्तान लिओनल मेसीले आफ्नो फुटबल करियरमा सात सयौं गोल पूरा गरेका छन् ।
स्पानिस ला लिगा अन्तर्गत गएराति एट्लेटिको मड्रिड विरुद्धको खेलमा मेसीले एक गोल गरे र उक्त कोशेढुंगा पूरा गरे । २-२ को बराबरीमा सकिएको उक्त खेलमा मेसीले ५०औं मिनेटमा पेनाल्टीबाट गोल गरेका थिए ।
मेसी अहिले एक्टिभ रहेका खेलाडीमध्ये सात सय गोल पूरा गर्ने दोस्रो खेलाडी हुन् । उनले ८६० खेलमा ७ सय गोल गरेका हुन् । युभेन्ट्सबाट खेल्ने पोर्चुगलका क्रिस्टियानो रोनाल्डोले पनि ७ सय गोल पूरा गरिसकेका छन् ।
मेसीले बार्सिलोनाका लागि ६३० गोल गरेका छन् भने आफ्नो देश अर्जेन्टिनाका लागि ७० गोल गरेका छन् । मेसी बार्सिलोना र अर्जेन्टिना को सर्वाधिक गोलकर्ता समेत हुन् ।
रोनाल्डोले एक हजार ७ खेलमा अहिलेसम्म ७२८ गोल गरिसकेका छन् ।
७०० गोल पूरा गर्ने अरू कोको ?
मेसी ७ सय गोल गर्ने समग्रमा सातौं खेलाडी बनेका छन् । मेसी र रोनाल्डोबाहेक अन्य ५ खेलाडीले पनि यो उपलब्धी हासिल गरेका छन् । फुटबलका किङ तथा ब्राजिलियन महान खेलाडी पेलेले १२ सय गोल गरेको बताइन्छ । तर उनले आधिकारिक रुपमा भने ७६७ गोल मात्र गरेको उल्लेख छ ।
अस्ट्रियन खेलाडी जोसेफ बिकानले कुल ८०५ गोल गरेका छन् ।
ब्राजिलका रोमारियोले ७७२, हंगेरीका लिजेण्ड फेरेन्च पुस्कासले ७४६ र जर्मनीका गर्ड मुलरले ७३५ गोल गरेका छन् ।
