२१ साउन, काठमाडौं । चितवनमा ७९ वर्षका वृद्धमा कोरोना संक्रमण पुष्टि भएको छ ।
भरतपुर कोरोना प्रयोगशालामा गरिएको परीक्षणमा उनमा बुधबार कोरोना संक्रमण पुष्टि भएको भरतपुर अस्पतालका सूचना अधिकारी लीलाधर पौडेलले जानकारी दिए ।
चितवनमा १२ दिनपछि बुधबार कोरोना संक्रमित भेटिएका हुन् ।
यी वृद्ध पछिल्लो समय घर छाडेर टाढा नगएको परिवारका सदस्यहरु बताउँछन् । उनका छोराका अनुसार वृद्ध नियमित फिजियोथेरापी गराउन जाने गरेका थिए । तर रुघाखोकी लागेपछि कोरोना संक्रमण परीक्षण गर्न स्वाब दिइएको थियो ।
उनलाई भरतपुर अस्पताल ल्याउने तयारी भइरहेको सूचना अधिकारी पौडेलले बताए । हाल चितवनमा यी वृद्धसहित ७ जना कोरोना भाइरसका सक्रिय संक्रमित रहेका छन् ।
