बुटवलको तरकारी थोक बजार निषेधित क्षेत्र घोषणा 

३ भदौ, बुटवल । बुटवल उपमहानगरपालिकाले बुटवलको तरकारी थोक बजारमा हरियो तरकारी बिक्री गर्न नपाइने गरी निषेधित क्षेत्र घोषणा गरेको छ ।

उपमहानगरपालिकाले बुधबार दिउँसो एक सूचना जारी गर्दै बिहीबार बिहानदेखि भदौ ७ गतेसम्म तरकारी थोक बजारलार्ई निषेधित क्षेत्र घोषणा गरेको हो ।

तरकारी बजारमा हुने भिडभाडले कोरोना संक्रमणको जोखिम बढ्ने स्थानीयको गुनासोलाई समेटेर अनलाइनखबरले बुधबार बिहान समाचार प्रकाशन गरेको थियो ।

यो पनि पढ्नुहोस

बुटवलको तरकारी थोक बजारबाट कोरोना संक्रमण फैलिने त्रास

उपमहानगरपालिकाका प्रमुख प्रशासकीय अधिकृत चक्रपाणी शर्माले जारी गरेको सूचनामा तरकारी थोक बजारमा हुने गरेको भिडभाडले कोरोना संक्रमण फैलिन सक्ने देखिएकाले लुम्बिनी प्रादेशिक अस्पतालदेखि तिनाउ पुलसम्म र तरकारी थोक बजारदेखि कालिकापथको न्यू इरा होटलसम्म तीन दिनका लागि हरियो तरकारी बिक्री वितरण गर्न नमिल्ने गरी निषेधित क्षेत्र कायम गरिएको उल्लेख छ ।

निषेधित क्षेत्रमा स्वास्थ्य सुरक्षा मापदण्ड पालना गरेर आलु, प्याज, लसुन र फलफूल बिहान ७ देखि ९ बजेसम्म बिक्री गर्न पाइने उपमहानगरले स्पष्ट पारेको छ ।

रुपन्देही प्रशासनले मंगलबारदेखि नै जिल्लाभर निषेधाज्ञा जारी गरेको र उपमहानगरपालिकाले समेत साउन २९ गतेदेखि लकडाउन गरेको सन्दर्भमा निषेधाज्ञा र लकडाउनलाई बेवास्ता गर्दै बुटवल उपमहानगरपालिका आफैं सञ्चालक सदस्य रहेको थोक तरकारी बजारमा संक्रमणको जोखिमलाई बढाउने गरी भिडभाड हुने गरेको थियो ।

तरकारी बजारमा ७० वटा भन्दा बढी तरकारी र फलफूल पसल छन् । जहाँ भारतका विभिन्न ठाउँबाट तरकारी र फलफूल बोकेर भारतीय ट्रक चालक र मजदुर थोकबजारसम्मै आउने गर्छन् ।

नेपालका पनि धेरै जिल्लाबाट यहाँ तरकारी आउने गर्छ । तर उपमहानगरपालिका र थोक बजार सञ्चालक समितिले बजारमा सामाजिक दुरी कायम गराउन, मास्क र सेनिटाइजर अनिवार्य प्रयोग गराउन चासो दिएको थिएन ।