हलमा व्यवसायिक रुपमा असफल भएको चलचित्र ‘समर लभ’ अब टीभीमा सार्वजनिक हुने भएको छ । दशैंको फूलपातीबाट यो चलचित्रलाई डीस होममा हेर्न मिल्नेछ । निर्देशक मुस्कान ढकालका अनुसार, डीसहोमको च्यानल नम्बर ८ मा दर्शकले शुल्क तिरेर यो चलचित्र हेर्न सक्नेछन् ।
ढकालले दशैंमा चलचित्र रिलिज गर्ने परम्परालाई जीवन्त राख्न टीभीमै भए पनि रिलिज गर्न लागिएको जानकारी दिएका छन् । यो बर्षको दशैंमा नयाँ चलचित्र हेर्न नपाएपनि दर्शकलाई खल्लो नहोस् भनेर चलचित्र स्याटलाइट रिलिज गर्ने निर्णय गरिएको ढकालले जानकारी दिए ।
डीसहोमको प्रदर्शनपछि चलचित्रलाई म्याक्स प्लेयर र नेट टीभीमा पनि रिलिज गर्ने तयारी भइरहेको छ । मुस्कानले चलचित्रलाई तत्काल युटुबमा भने रिलिज नगरिने बताए । सुरज सिंह ठकुरी, आशिष पिया, रेवती क्षेत्री, नम्रता सापकोटा आदि कलाकारको अभिनय रहेको यो चलचित्र गत सालको माघ २५ मा हलमा रिलिज भएको थियो । चलचित्रलाई खगेन्द्र श्रेष्ठले निर्माण गरेका हुन् ।
हलमा व्यवसायिक रुपमा असफल भएपनि विभिन्न डिजिटल प्लेटफर्म तथा टेलिभिजनमा चलचित्र रिलिज हुँदा निर्मातालाई थोरै भएपनि राहत मिल्दै आएको छ ।
