‘कपिल शर्मा शो’लाई मुकेशले ‘भल्गर शो’ भनेपछि कपिलको यस्तो जवाफ

कोरोना भाइरसको महामारी चलिरहेको समयमा कमेडियन कपिल शर्माले आफ्नो चर्चित कमेडी रियालिटी शो ‘दि कपिल शर्मा शो’को छायांकन भने अगाडि बढाइरहेका छन् । दर्शकको उपस्थितीविना नै यो शोको छायांकन भैरहेको छ ।

केही हप्ता अगाडि यो शोमा महाभारतका कलाकारहरु अतिथी बनेर पुगेका थिए । यो शोमा पुनित इस्सर, नीतिश भारद्धाज, गजेन्द्र चौहान लगायतका कलाकार पुगेका थिए । यो शोले दर्शकको राम्रो प्रतिक्रिया पनि पाएको थियो ।

तर, यो शोमा महाभारतका अर्का कलाकार मुकेश खन्ना भने उपस्थित भएनन् । उनले, शोको टिमले गरेको निमन्त्रणालाई अस्विकार गर्दै यो शोलाई भल्गर र खराब भनेका थिए ।

उनले, यो शोमा दोहोरो अर्थ लाग्ने शब्दको प्रयोग धेरै हुने भन्दै सहभागी नहुने बताएका थिए । मुकेशको यो भनाइलाई लिएर शोका संचालक कपिल शर्माले जवाफ दिएका छन् ।

कपिलले भारतीय मिडियासँग कुरा गर्दै भनेका छन्–‘मेरो टिम यो महामारीको समयमा मानिसहरुको अनुहारमा मुस्कान ल्याउनका लागि कडा मिहिनेत गरिरहेको छ । जब पुरै दुनियाँ मुश्किल समय बिताइरहेको छ भने उनीहरुको अनुहारमा मुस्कान ल्याउन जरुरी छ ।’

मुकेशको भनाइमा टिप्पणी गर्दै कपिलले भने–‘यो मानिसहरुको सोचमा भर पर्छ । कुन कुरामा खुशी खोज्ने भन्ने कुरा मानिसले नै जान्ने कुरा हो । मैले खुशीलाई रोजेँ र आफ्नो काममा नै फोकस हुन आवश्यक ठाने । र भविष्यमा पनि म यो काम गरिरहनेछु ।’