३ पुस, काठमाडौं । नेपाल खेलकुद पत्रकार मञ्च (एनएसजेफ) ले प्रदान गर्ने पल्सर स्पोर्ट्स अवार्ड २०७७ एउटा विधा पिपुल्स च्वाइस अवार्डको मनोनयनमा महिला खेलारुको वर्चस्व रहेको छ ।
मञ्चका सचिव गोविन्द रेग्मीको संयोजकत्वमा रहेको खेलाडी छनोट समितिले अन्तिम ५ जनाको सूची तयार पार्दै शुक्रबार सार्वजनिक गरेको हो । जसमा ४ जना महिला खेलाडी छन् भने एक जना मात्र पुरुष खेलाडी छन् ।
१३ औं सागमा चार स्वर्ण जित्दै इतिहास रचेकी गौरिका सिंह, नेपाली भलिबल इतिहासमै पहिलो स्वर्ण जित्ने टिमका कप्तान अरुणा शाही, करातेका मन्डेकाजी श्रेष्ठ, बास्केटबलकी सदिना श्रेष्ठ र फुटबलकी सावित्रा भण्डारी मनोनयनमा परेका छन् ।
दुई खेलाडी व्यक्तिगत विधाका र तीन खेलाडी टिम इभेन्टबाट छन् ।
गौरिकाले १३ औं दक्षिण एसियाली खेलकुद प्रतियोगिता (साग) मा चार स्वर्ण जितेकी थिइन् भने मन्डेले २ स्वर्ण जितेका थिए ।
यस्तै भलिबलकी अरुणा शाही, फुटबलकी सावित्रा भण्डारी र बास्केटबलकी सदिना श्रेष्ठले १३ औं सागमा रजत जितेका थिए ।
अरुणाको कप्तानीमा महिला भलिबल टिम र सदिनाको कप्तानीमा महिला बास्केटबल टिमले सागमा जितेको रजतको उपाधि अहिलेसम्मको उच्च हो । अरुणाको कप्तानीमा नेपालले गत वर्ष एभिसी सेन्ट्रल जोनमा उपाधि जितेको थियो । यस्तै सावित्रा महिला फुटबल टिमले रजत जित्दाको टिममा महत्वपूर्ण सदस्य थिइन् ।
जेठमै हुनुपर्ने अवार्ड कार्यक्रम यस पटक कोरोना महामारीका कारण प्रभावित बनेको थियो । महामारीले गर्दा ढिला गरी हुन लागेको अवार्ड कार्यक्रम यस पटक सेमी भर्चुअल माध्यमबाट हुने मञ्चले जनाएको छ । पल्सर स्पोर्ट्स अवार्डमा कूल १० विधामा अवार्ड वितरण हुनेछ ।
वर्षको उत्कृष्ट खेलाडी पुरुष, महिला र युवा तथा उत्कृष्ट प्रशिक्षक विधाको मनोनयन केहीदिनमै सार्वजनिक गर्ने छनोट समितिका संयोजक रेग्मीले जानकारी दिए । यस्तै लाइफटाइम अचिभमेन्ट अवार्ड पारा एथलिट अवार्ड स्पेशल अवार्ड र टिम अफ दी इअर अवार्डको घोषणा कार्यक्रमै दिन पुस २८ गते घोषणा गरिनेछ । यस पटक पनि एक अन्तर्राष्ट्रिय खेल पत्रकारलाई सम्मान गर्ने मञ्चले जनाएको छ ।
मनोनयनमा परेका खेलाडीलाई ईसेवाबाट पनि भोट गर्न सकिने नेपाल खेलकुद पत्रकार मञ्चले जनाएको छ । ईसेवामार्फत भोटिङ, फेसबुक लाइक, मञ्चका सदस्य पत्रकारको मत र राष्ट्रिय संघका मुख्य प्रशिक्षकहरुको मतका आधारमा उत्कृष्ट खेलाडी छनोट हुनेछ ।
खेलाडीहरुलाई शुक्रबार बेलुका ६ बजेदेखि पुस २७ गते राति १२ बजेसम्म मत दिन सकिने मञ्चले जनाएको छ । यसअघि एसएमएसबाट मत लिने गरिए पनि यस वर्ष ईसेवाबाट मत लिने व्यवस्था गरिएको हो । खेलाडीले ईसेवाबाट पाएको मतको भार ५० प्रतिशत रहनेछ भने फेसबुक लाइमको मतभार २५ प्रतिशत रहनेछ । यस्तै मन्चका पत्रकार र प्रशिक्षकहरुको मतको भार १२.५-१२.५ गरी २५ प्रतिशत रहनेछ ।
पिपुल च्वाइस अवार्डका लागि मनोनयमा परेका चार खेलाडीहरुले महामारीको जटिल अवस्थामा पनि मञ्चले अवार्ड कार्यक्रम गर्न लागेकामा खुशी व्यक्त गरे । मनोनयनमा परेकी गौरिका लण्डनमा भएकाले उपस्थित थिइनन् ।
पिपुल च्वाइस विधामा मनोनयनमा परेका खेलाडीले २०७६ मा पाएको सफलता र उपलब्धी यस्तो छ ।
१. गौरिका सिंह- पौडी
- १३ औं दक्षिण एसियाली खेलकुदमा चार स्वर्णको कीर्तिमानसहित थप दुई रजत र दुई कास्य ।
- आठौं राष्ट्रिय खेलकुदमा आफू सहभागी सबै १२ स्पर्धामा स्वर्ण पदक
- करिश्मा कार्कीले बनाएको धेरै स्वर्ण जित्ने कीर्तिमानमा बराबर ।
- दक्षिण कोरियामा आयोजित १८ औं फिना विश्व च्याम्पियनसिपमा १ सय र २ सय मिटर फ्रिस्टायलमा प्रतिस्पर्धा ।
२. अरुणा शाही- भलिबल
- नेपाली महिला भलिबल टोलीकी कप्तान
- एभिसी सेन्ट्रल जोन महिला भलिबल च्याम्पियनसिपमा स्वर्ण
- १३ औं सागमा ऐतिहासिक रजत
३. मन्डेकाजी श्रेष्ठ- कराते
- १३ औं सागमा टिम काता र एकल कातामा दुई स्वर्ण पदक
- आठौं राष्ट्रिय खेलकुदमा एकल कातामा स्वर्ण पदक र टिम कातामा रजत पदक
- बंगलादेशमा भएको साफ च्याम्पियनसिपमा टिम कातामा स्वर्ण पदक र एकल कातामा कास्य पदक
- नवौं थाइल्याण्ड ओपन च्याम्पियनसिपमा सिनियर कातामा रजत, उत्कृष्ट खेलाडी घोषित
४. सदिना श्रेष्ठ – बास्केटबल
- १३ औं सागमा रजत पदक ।
- आठौं राष्ट्रिय खेलकुद प्रतियोगितामा प्रदेश ३ टिमबाट रजत पदक
- एनबीएल बास्केटबल लिगमा समृद्धि गोरिल्लाज टिमबाट रजत पदक
५. सावित्रा भण्डारी- फुटबल
- १३ सागमा रजत पदक ।
- आठौं राष्ट्रिय खेलकुदमा एपीएफबाट स्वर्ण पदक
- इन्डियन वुमन्स लिग २०१८-१९ को विजेता सेथु एफसीबाट
- प्रधानसेनापति कप विजेता एपीएफबाट
- इन्डियन वुमन्स लिग २०१९-२० विजेता गोकुलम केरलाबाट
- नाजेझ्दा कप उपविजेता
- सहभागी अधिकांश प्रतियोगितामा सर्वाधिक गोलकर्ता
- नेपालका लागि सर्वाधिक अन्तर्राष्ट्रिय गोल गर्ने कीर्तिमान ।
