४ पुस, काठमाडौं । साविक विजेता लिभरपुलले प्रिमियर लिगमा क्रिस्टल प्यालेसमाथि फराकिलो जित हात पारेको छ । शनिबार भएको खेलमा लिभरपुलले घरेलु मैदानमा प्यालेसलाई ७-० ले पराजित गरेको हो ।
लिभरपुलका लागि रोवर्टो फिर्मिनो र वैकल्पिक खेलाडीको रुपमा मैदान प्रवेश गरेका मोहम्मद सालाहले दुई-दुई गोल गरे । ताकुकी मिनामिनो, साडियो माने र कप्तान जोर्डन हेन्डरसनले एक-एक गोल गरे ।
एनफिल्डमा भएको खेलको तेस्रो मिनेटमै मिनिनोले गोल गर्दै लिभरपुललाई अग्रता दिलाए । मानेले ३५औं र फिर्मिनोले ४४औं मिनेटमा गोल गरेपछि लिभरपुलले पहिलो हाफमै तीन गोलको अग्रता बनायो । दोस्रो हाफमा लिभरपुलले चार गोल थप्यो ।
५२औं मिनेटमा जोर्डन हेन्डरसनले लिभरपुलका लागि चौथो गोल गरे । ६८औं मिनेटमा फिर्मिनोले व्यक्तिगत दोस्रो गोल गरेपछि लिभरपुलले ५-० को अग्रता बनायो ।
५७औं मिनेटमा मानेको स्थानमा मैदान प्रवेश गरेका सालाहले ८१औं र ८४औं मिनेटमा दुई गोल गरेपछि लिभरपुले ७-० को शानदार जित हात पारेको हो ।
जितपछि लिग लिडर लिभरपुलले शीर्ष स्थानमा ६ अंकको अग्रता बनाएको छ । १४ खेलबाट लिभरपुलको ३१ अंक भएको छ । एक खेल कम खेलेको टोटनहम हट्सपर २५ अंकसहित दोस्रो स्थानमा छ