चरित्र बदलिरहने मानिसलाई छेपारोको संज्ञा दिइन्छ । किनकि छेपारो यस्तो जीव हो जसले बाह्य वातावरणसँग मिल्ने गरी शरीरको रङ बदल्न सक्दछ ।
के बिरालोले पनि छेपारोले जस्तो रङ बदल्न सक्दछ ? सक्ने कुरै भएन । तर छिमेकी मुलुक भारतको गुजराँतमा रहेको एउटा बिरालोले चाहिँ शरीरको रङ बदल्न सक्दछ, छेपारोले जस्तै ।
गुजरातको अंकलेश्वरस्थित किशोर गायकवाड नामका व्यक्तिले घरमा पालेको बिरालो शरीरको रङ फेर्न माहिर छ ।
किशोरले सन् २०१३ मा मुम्बइस्थित एक मन्दिर बाहिर केटाकेटीहरुले कुटिरहेको अवस्थामा फेला पारेर उक्त बिरालोलाई आफ्नो घरमा ल्याएका थिए ।
घर ल्याएपछि मात्र उनले उक्त बिरालो अन्य आम बिरालोहरु भन्दा फरक रहेको चाल पाए । सो बिरालोले समय समयमा आफ्नो जीउको रङ बदल्न सक्दछ ।
किशोरका अनुसार उसको शरीरका भुत्लाहरुमा समय समयमा विभिन्न धार्मिक चिह्नसमेत देखा पर्दछन् ।
उनका अनुसार यो बिरालो किन्नका लागि धेरै मानिसहरुले इच्छा जाहेर गरेका छन् । यो बिरालोका लागि ५५ करोड भारुसम्म तिर्न केही मानिस तयार भएको दाबी किशोरको छ । एजेन्सी
