२१ पुस, काठमाडौं । भक्तपुरको इतापाकोमा सडक बत्ती जडान गर्ने क्रममा करेन्ट लागेर एकजनाको मृत्यु भएको छ । मृत्यु हुनेमा ब्यासीका २३ वर्षीय रामकुमार बुढाथोकी छन् ।
भक्तपुर प्रहरीका डीएसपी दिपक गिरीका अनुसार मंगलबार दिउँसो १ बजे बत्ती जडान गर्ने क्रममा एकजना सडकमा पछारिएको र अर्का व्यक्ति पोलमा नै अड्किएको भन्ने खबर आएको थियो । लगत्तै विजुली काटेर एम्बुलेन्ससहित प्रहरी टोली घटनास्थलमा पुगेको थियो ।
त्यसक्रममा दुवै घाइतेलाई अस्पताल लगिएकोमा बुढाथोकीलाई चिकित्सकले मृत घोषित गरेका थिए भने अर्का घाइते सिन्धुली घर भइ बल्खु बस्ने २७ वर्षीय विक्रम मोक्तानको कीर्तिपुर अस्पतालमा उपचार भइरहेको छ ।
थप अनुसन्धान जारी छ ।
