२० माघ, काठमाडौं । जनउत्थान लघुवित्त वित्तीय संस्थाले गत आर्थिक वर्ष २०७६÷७७ को मूनाफाबाट लगानीकर्ताहरुलाई बम्पर लाभांश घोषणा गरेको छ । सोमबार अपरान्ह बसेको संस्थाको संञ्चालक समिति बैठकले ५२ प्रतिशत लाभांश दिने निर्णय गरेको हो । यो चालु आर्थिक वर्षमा लाभांश घोषणा गर्ने सबै कम्पनीहरु भन्दा धेरै हो ।
संस्थाका प्रमुख कार्यकारी अधिकृत श्रीराम पोख्रेलले सञ्चालक समितिले बोनस सेयर ४९.४० प्रतिशत र नगद लाभांश (कर प्रयोजनका लागि) २.६० प्रतिशत दिने निर्णय गरेको भन्दै नेपाल स्टक एक्सचेञ्जलाई जानकारी दिएका छन् ।
अब नेपाल राष्ट्र बैंकले स्वीकृत दिएर साधारणसभाले पारित गरेपछि मात्रै लाभांश लगानीकर्ताले पाउनेछन् । जनउत्थानले घोषणा गरेको यस वर्षको सबैभन्दा उच्च हो । यस अघि नेपाल लाइफले ५१ प्रतिशत लाभांश दिने घोषणा गरेको थियो ।
