नायिका संचिता लुइटेलले आफू चलचित्र क्षेत्रमा आउँछु होला भनेर कहिले पनि नसोचेको बताएकी छिन् । काठमाण्डौको काठमाण्डौ मलमा संचालनमा आएको ‘डाडु पन्यू रेष्टुरेन्ट’को उद्घाटन गर्ने क्रममा संचिताले धेरै चलचित्र हेर्दा आफूलाई पर्दामा जे देख्यो त्यही बन्छु होला भन्ने लागेको बताइन् । तर, चलचित्रमा नै आउँछु होला भन्ने कहिले पनि नलागेको उनको तर्क छ ।
संचिताले उनका श्रीमान् नायक निखिल उप्रेतीले नै बनाउन लागेको चलचित्र ‘आयो भैरव’मा काम गर्ने चर्चा समेत चलेको थियो । तर, अहिले यो चलचित्र चर्चा सेलाएको छ । संचिताले भने आफूले एउटा चलचित्रको स्क्रिप्ट पढ्दै गरेको र मन परेको खण्डमा काम गर्ने उल्लेख गरेकी छिन् ।
‘अप्सरा’ चलचित्रबाट उदाएकी संचिता २ सन्तानलाई जन्म दिएपछि भने घरयासी काममा नै बढी व्यस्त देखिएकी छिन् । संचिताले केही चलचित्रमा काम गरेपनि उनको क्रेज भने फर्किएको छैन ।
