१७ फागुन, काठमाडौं । काठमाडौंको जितपुरफेदी खोलामा एक पुरुष मृत अवस्थामा फेला परेका छन् । तार्केश्वर नगरपालिका-३ का ६२ वर्षीय रामकृष्ण शाही सोमबार मृत अवस्थामा फेला परेको प्रहरीले जनाएको छ ।
यस्तै पोखरा महानगरपालिका-२० भलामस्थित मौजा कच्ची सडकको नालामा पनि एकजना मृत अवस्थामा फेला परेका छन् । दाङ लमही घर भई पोखरामा बस्दै आएका ३६ वर्षीय नन्दु घर्ती सोमबार मृत अवस्थामा भेटिएका हुन् ।
यसैगरी गुल्मीको रेसुङ्गा नगरपालिका-३ भाडगाउँ बस्ने २१ वर्षीया सम्झना खत्री सोही ठाउँको वनमाराको झाडीभित्र मृत भेटिएकी छन् । गत माघ २९ गतेदेखि हराएकी खत्रीको खोजी गर्ने क्रममा घरदेखि करिब १ सय २० मिटर टाढा रहेको उक्त झाडीभित्र सोमबार उनको शव फेला परेको हो ।
यस सम्बन्धमा थप अनुसन्धान भइरहेको प्रहरीले जनाएको छ ।
