११ चैत, सप्तरी । पूर्व पश्चिम राजमार्ग अन्तर्गत सप्तरीको हनुमाननगर कंकालिनी नगरपालिका वडा नम्बर ३ मा ट्रकको ठक्करबाट एक जनाको मृत्यु भएको छ भने अर्का एक जना घाइते भएका छन् ।
पूर्वबाट पश्चिमतर्फ जाँदै गरेको को.३३प ७७१६ नम्बरको मोटरसाइकललाई सोही दिशातर्फ जाँदै गरेको ना.७ख ९३३९ नम्बरको ट्रकले पछाडिबाट ठक्कर दिएको प्रहरीले जनाएको छ ।
ठक्करले मोटरसाइकलमा सवार कञ्चनरुप नगरपालिका वडा नम्बर ५ निवासी २० वर्षीय देवकुमार चौधरीको घटनास्थलमै मृत्यु भएको सप्तरी प्रहरीका प्रवक्ता माधव प्रसाद काफ्लेले जानकारी दिए ।
सोही मोटरसाइकलमा सबार कञ्चनरुप ५ कै १९ वर्षीय प्रदीप मुखिया घाइते भएका छन् । घाइतेको स्थानीयस्तरमा उपचार भइरहेको प्रहरीले जनाएको छ ।
मृतकको शवलाई पोष्टमार्टम गराई ठक्कर दिने ट्रक र त्यसका चालकलाई नियन्त्रणमा लिइएको प्रहरीले जनाएको छ ।
