अमेरिकाको क्यालिफोर्नियामा अन्धाधुन्ध गोली चल्दा चारजनाको मृत्यु, दुई घाइते

१९ चैत, काठमाडौं । अमेरिकाको क्यालिफोर्नियास्थित अरेन्ज शहरमा अन्धाधुन्ध गोली चल्दा चारजनाको मृत्यु भएको छ ।

शहरको एक कार्यालय भवनमा उक्त आक्रमण भएको अन्तर्राष्ट्रिय सञ्चारमाध्यमहरुले जनाएका छन् । मृत्यु हुनेमा एक बालक पनि छन् । यो घटनामा आरोपीसहित थप दुईजना घाइते भएको प्रहरीले बताएको छ ।

योसँगै अमेरिकामा एक महिनाभित्र भएको यो तेस्रो गोली आक्रमण हो । बिहीबारको अन्धाधुन्ध गोली आक्रमणको उद्देश्य भने स्पष्ट हुन नसकेको प्रहरीले जनाएको छ । प्रहरीले आरोपी नियन्त्रणमा आइसकेकाले अब कुनै जोखिम नरहेको बताएको छ ।

गत मार्च १६ मा अमेरिकाको जर्जियामा भएको अन्धाधुन्ध गोली आक्रमणमा परी आठजनाको मृत्यु भएको थियो । यस्तै मार्च २२ मा कोलोराडोमा पनि अन्धाधुन्ध गोली आक्रमण हुँदा १० जना मारिएका थिए ।

एजेन्सीहरुको सहयोगमा