२२ चैत, काठमाडौं । विभागीय टोली एपीएफले ललितपुर मेयर वुमन्स च्याम्पियनसिप टी–२० क्रिकेटमा लगातार दोस्रो जित हात पारेको छ ।
कीर्तिपुरस्थित टीयू क्रिकेट मैदानमा आइतबार भएको खेलमा एपीएफले सुदूरपश्चिम प्रदेशलाई ३७ रनले हरायो । एपीएफले दिएको १२८ रनको लक्ष्य पछ्याएको सुदूरपश्चिमले १९ ओभरमा सबै विकेट गुमाएर ९० रनमा अलआउट भयो ।
सुदूरपश्चिमका लागि सुनिता लुहारले सर्वाधिक २३ रन बनाइन् । यस्तै डोली भट्टले १६ र रेवती धामीले १२ रन बनाए आउट भइन् । सुदूरपश्चिमका अन्य खेलाडीले दोहोरो अंक जोड्न सकेनन् ।
एपीएफकी बिनु बुढाले ३ विकेट लिइन् । यस्तै सीता राना मगर र सुमन विष्टले २/२ तथा रेखा रावल र सुष्मा श्रेष्ठले एक-एक विकेट लिए ।
त्यसअघि टस जितेर पहिले ब्याटिङ गरेको एपीएफले २० ओभरमा २ विकेट गुमाएर १२७ रन बनाएको थियो । एपीएफका लागि ज्योति पाण्डेले ५९ रन बनाइन् । यस्तै सरिता मगरले अविजित ३५ रन बनाइन् । कप्तान सरिता राना मगर १६ रन बनाएर आउट भइन् ।
सुदूरपश्चिमकी कविता जोशी र सुनिता लुहारले १/१ विकेट लिए । लगातार दोस्रो जितपछि एपीएफले २ खेलमा ४ अंक जोडेको छ । एपीएफले पहिलो खेलमा प्रदेश १ लाई ८ विकेटले हराएको थियो ।
सुदूरपश्चिमको भने यो पहिलो हार हो । सुदूरपश्चिमले पहिलो खेलमा ललितपुर मेयर्स-११ लाई ७ विकेटले हराएको थियो ।
