२१ वैशाख, काठमाडौं । मेक्सिकोको राजधानी सहर मेक्सिको सिटीमा मेट्रो रेल चल्ने ओभरपास भत्किदा कम्तीमा २० जनाको मृत्यु भएको छ ।
अन्तर्राष्ट्रिय सञ्चारमाध्यमहरुका अनुसार सोमबार मेट्रो रेल चलिरहेको अवस्थामा ओभरपास भत्किएको थियो । ओभरपास भत्किँदा सडकमा गुडिरहेको कम्तीमा एउटा कार पनि थिचिएको अधिकारीहरुले बताएका छन् ।
अधिकारीहरुले हाल उद्धार कार्य जारी रहेको बताएका छन् । उक्त दुर्घटनामा परी करिब ७० जना मानिसहरु घाइते भएका छन् ।
घाइतेहरुको स्थानीय अस्पतालमा उपचार भइरहेको र उनीहरुमध्ये धेरैको अवस्था गम्भीर रहेको मेक्सिको सिटीकी मेयर क्लाउडिया सेइनबाउमले बताएकी छिन् ।
ओभरपास भत्किएको विषयमा थप अनुसन्धान हुने सेइनबाउमले बताएकी छिन् ।
एजेन्सीको सहयोगमा
