५ जेठ, वीरगञ्ज । बारामा प्रहरीले श्रीमती हत्याको आरोपमा एक जनालाई पक्राउ गरेको छ । जीतपुर सिमरा उपमहानगरपालिका– ३ बजनी छिमेकी बैंक टोलका ५६ वर्षीय हरिबहादुर कार्की पक्राउ परेका हुन् ।
कार्कीलाई वैशाख ९ गते श्रीमती ४५ वर्षीया पार्वती कार्कीको हत्या गरेको आरोपमा पक्राउ गरेको जिल्ला प्रहरी कार्यालय बाराका प्रवक्ता प्रहरी नायब उपरीक्षक गौतम मिश्रले जानकारी दिए ।
वैशाख ९ गते राति श्रीमान श्रीमतीबीचको झगडामा हरिबहादुरले इँटाले हिर्काएका थिए । भोलिपल्ट पार्वती घरको माथिल्लो तल्लामा मृत अवस्थामा भेटिएकी थिइन् ।
घटनापछि फरार कार्कीलाई ईलाका प्रहरी कार्यालय सिमराको टोलीले जितपुर सिमरा– २ बाट पक्राउ गरेको हो ।
