१४ जेठ, काठमाडौं । महान्यायाधिवक्ता रमेश बडालले सभामुखले बोलाएको छलफलमा जाने कानुन व्यवसायीलाई प्रतिनिधिसभा विघटनसम्बन्धी मुद्दामा सरकारको विपक्षमा बहस गर्न नमिल्ने बताएका छन् ।
शुक्रबार संवैधानिक इजलासमा उनले सभामुखलाई राय दिने वकिलले संसद विघटनको मुद्दाको विपक्षमा बहस गर्न नमिल्ने बताएका हुन् ।
‘सभामुखलाई राय दिनेले यहाँ आएर विपक्षमा बहस गर्न मिल्दैन । यो गर्न कानुन व्यवसायीको आचारसंहिताले दिँदैन’ बडालले भने । संसद विघटनसम्बन्धी केही रिटमा सभामुख अग्निप्रसाद सापकोटालाई पनि विपक्षी बनाइएको छ । कानुन व्यवसायीले एउटै मुद्दाको पक्ष र विपक्षमा बहस गर्न नमिल्ने व्यवस्था छ । महान्यायाधिवक्ता बडालले आचारसंहिताको सोही विषय उठाएका हुन् ।
बिहीबार सभामुख सापकोटाले कानुन व्यवसायीसँग गरेको छलफलमा वरिष्ठ अधिवक्ता चन्द्रकान्त ज्ञवाली, अधिवक्ता भीमार्जुन आचार्यलगायत सहभागी थिए ।