१० असार, रामेछाप । रामेछापको खाँडादेवी गाउँपालिका–३ आँपचौरमा रोकिराखेको मोटरसाइकलमाथि आगजनी र तोडफोड गरेको अभियोगमा प्रहरीले दुई जनालाई पक्राउ गरेको छ ।
मंगलबार मध्यरातमा सडकमा रोकिराखेको बा १९ प ७१ नम्बरको मोटरसाइकलमा आगजनी र प्रदेश ३–०२–०१३ प १३ नम्बरको मोटरसाइकल तोडफोड गरेको आरोपमा गएराति दुई जनालाई पक्राउ गरिएको प्रहरी नायब उपरीक्षक नवराज ढुंगानाले जानकारी दिए ।
पक्राउ पर्नेमा सोही वडा कार्यालयमा कार्यरत कार्यालय सहयोगी २८ वर्षीय पदमबहादुर कार्की र खाँडादेवी–३ कै ३० वर्षीय लक्ष्मण खत्री रहेका छन् । उनीहरुमाथि मोटरसाइकलमा क्षति पु¥याएको भन्दै पीडितले प्रहरी कार्यालयमा उजुरी दिएका थिए ।
रातको समयमा मदिरा सेवन गरी उनीहरुले उक्त घटना गराएको डीएसपी ढुंगानाले बताए । पक्राउ परेका दुवैमाथि जिल्ला अदालतबाट मुलुकी अपराध संहिताअनुसार आपराधिक उपद्रव मुद्दा शीर्षकमा म्याद थप गरी अनुसन्धान थालिने प्रहरीले जनाएको छ ।
