७ साउन, काठमाडौं । ३२ औं संस्करणको गृष्मकालीन ओलम्पिक शुक्रबार देखि जापानमा शुरु हुँदैछ । केही खेलको प्रतिस्पर्धा शुरु भइसकेको छ भने शुक्रबार टोकियोमा औपचारिक रुपमा टोकियो २०२० ओलम्पिकको उद्घाटन हुँदैछ ।
तर कोभिड-१९ को त्रासका कारण एउटा देशले भने ओलम्पिकमा आफ्नो टिम नपठाउने निर्णय गरेको छ । गिनीको सरकारले खेलकुदको कुम्भमेला शुरु हुनु दुई दिनअघि मात्रै कोभिड-१९ को डरका कारण आफ्नो खेलाडी टोकियो ओलम्पिकमा नपठाउने निर्णय गरेको हो ।
गिनीबाट ५ खेलाडीले प्रतिस्पर्धा गर्ने तय थियो । जसमा पौडीबाट दुई तथा एथ्लेटिक्स, जुडो र रेस्टलिङबाट १-१ खेलाडी छन् । गिनीको टिम जापान जान बाँकी नै रहेको अवस्थामा गिनी सरकारले यो निर्णय गरेको हो ।
‘कोभिड-१९ भेरियन्टको को त्रास बढिरहेको अवस्थामा गिनीका खेलाडीको स्वास्थ्यलाई ध्यानमा राख्दै सरकारले ओलम्पिकमा सहभागिता रद्द गरेको छ’ खेलकुद मन्त्री सानोउस्यी बान्तामा सोले स्टेटमेन्टमा लेखेका छन् ।
कुनै पनि देशले आफ्नो पूरा टिम नै ओलम्पिकमा नपठाउने निर्णय गरेको यो दोस्रो पटक हो । यसअघि नर्थ कोरियाले नि अप्रिलमा यस्तै निर्णय गरेको थियो ।
