ए डिभिजन लिगको छैटौं चरण : मछिन्द्रको शान, संकटाको लय

१३ पुस, काठमाडौं । शहीद स्मारक ए डिभिजन लिगको १३ मध्ये ६ वटा चरणको खेल सकिएको छ । छैटौं चरणका खेल सकिँदा केही रोमाञ्चक खेलहरु भए । छैटौं चरणका खेलहरुमध्ये उपाधि दाबेदार दुई क्लब मछिन्द्र फुटबल क्लब र मनाङ मर्स्याङ्दी क्लबबीचको खेलमा दर्शकको उल्लेख्य उपस्थिति थियो ।

सर्वाधिक ८ पटकको च्याम्पियन मनाङको अपराजित यात्रालाई साविक विजेता मछिन्द्रले ब्रेक लगाउँदै शीर्ष स्थानमा उक्लँदा फ्रेण्ड्स भने अझै जितको खोजीमै छ । यस चरणमा एकै खेलमा ६ गोलसमेत भए भने रेफ्रीको आलोचना पनि चर्चायोग्य विषय बने ।

छैटौं चरणमा आइपुग्दा थ्रीस्टार क्लबले गोल गर्न संघर्ष गरिरहँदा संकटाले लय कायम राखेको छ । च्यासल युथलाई रेलिगेसनको दबाब बढ्दैछ । त्रिभुवन आर्मी क्लब एएफसी कप छनोटको होडबाट बाहिरिएको छ । सुरुवाती तीन खेल हारेको जाउलाखेल पछिल्लो दुईमा लगातार जित हात पार्दै लयमा फर्केको छ ।

शहीद स्मारक ए डिभिजन लिगको करिब आधा खेल सकिँदा उपाधि होडमा मछिन्द्र, मनाङ मर्स्याङ्दी र संकटा क्लब देखिएका छन् । तीन क्लबबीच जम्मा २ अंकको मात्र अन्तर छ । मछिन्द्र १४ अंकसहित शीर्ष स्थानमा उक्लँदा मनाङ १३ अंकसहित दोस्रोमा छ भने १२ अंक जोडेको संकटा तेस्रोमा छ ।

६ गोल

छैटौं चरणको पहिलो खेल एनआरटी र एपीएफबीच भयो । लिग तालिकाको मध्यतिर रहेको एनआरटी र र रेलिगेसन जोनबाट भर्खरै माथि उठेको एपीएफ क्लबबीच खेल रोमाञ्चक होला भनेर धेरैले सोचेका थिएनन् । तर जारी लिगकै सर्वाधिक गोल भएको खेल ३-३ को बराबरीमा टुंगियो । एनआरटीले दुई गोलको अग्रता जोगाउन सकेन भने एपीएफले शानदार पुनरागमन गर्‍यो ।

दर्शन गुरुङले लगातार गोल गर्दै एनआरटीलाई अग्रता दिलाएका थिए । तर एपीएफका आशिष लामाले बराबरी गोल फर्काए । त्यसपछि दर्शन र मेसुके ओलोमोउले गोल गरेपछि एनआरटीले ३-१ को अग्रता बनाएपनि जोगाउन सकेन । तर चार मिनेट अन्तरमा नविन लामा र दिपेश धिमालले गोल फर्काएपछि एपीएफले अंक खोसेको हो ।

हेभीवेट भिडन्त

जारी लिगको ३९ औं खेल साविक विजेता मछिन्द्र क्लब र मनाङ मर्स्याङ्दीबीच थियो । लिगका शीर्ष दुई टिम, उपाधि दाबेदार अनि एएफसी कप छनोटका लागि छानिने होडमा रहेका टोलीबीचको खेलमा जम्मा एक गोल मात्र भयो ।

यसमा निर्णायक बने मछिन्द्रका सुनिल बल । उनले इन्जुरी टाइमको दोस्रो मिनेटमा गोल गर्दै मछिन्द्रको जित सुनिश्चित गरे । १० हजार दर्शक उपस्थित खेलमा ९० मिनेटसम्म कुनै गोल नहुँदा उपाधि दाबेदार दुई क्लब अंक बाँड्ने स्थितिमा थिए । तर मनाङका सोमिडेले बल ह्याण्ड गरेपछि मछिन्द्रले फ्रिकिक पायो । त्यसमा सुनिल बलले शानदार गोल गरे ।

मनाङलाई हराएर शीर्ष स्थानमा उक्लेको मछिन्द्रले एएफसी कप छनोट खेल्ने सम्भावना बलियो बनाउदै पोल पोलिसनमा पुग्दा मनाङले भने आफ्नै गल्तीले खेल गुमायो । मछिन्द्रसंग बराबरीले मात्र पनि मनाङलाई फाइदा हुने स्थितीमा ३ अंकको पछि लाग्दा मनाङले अंक नै जोड्न सकेन ।

संकटाको लय

संकटा क्लबमा कुनै स्टार खेलाडी छैनन् । राष्ट्रिय टिमबाट खेल्ने वर्तमान टिमको पनि कोही खेलाडी छैन । न स्टार विदेशी खेलाडी छ । तैपनि युवा प्रशिक्षक विष्णु गुरुङको प्रशिक्षणमा संकटाले गज्जबको प्रदर्शन गरिरहेको छ । रवि सिलवालको कप्तानीमा रहेको संकटा मछिन्द्र र आर्मीसंगै छैटौं चरणसम्म अपराजित रहने क्रममा शीर्ष तीनभित्र छ ।

छैटौं खेलमा ब्रिगेड ब्वाइजमाथि ३-० को शानदार जितपछि संकटा १२ अंक जोडेर तेस्रो स्थानमा छ । संकटाले उपाधि दाबेदार मछिन्द्र र मनाङलाई पछ्याइरहेको छ भने अर्को दाबेदार मानिएको आर्मीलाई २ अंकले पछि पारिसकेको छ ।

लिगको उपाधि दाबेदार मछिन्द्र र मनाङसंग बराबरी खेल्दै अंक जोड्न सफल संकटाले फ्रेण्ड्स, नेपाल पुलिस र ब्रिगेडलाई हराएको छ । लिगको पहिलो खेलमा संकटाले हिमालयन शेर्पासंग बराबरी खेलेको थियो ।

पूर्व खेलाडी विष्णु गुरुङले यसै सिजनदेखि ए डिभिजन लिगमा प्रशिक्षकको रुपमा डेब्यु गरेका हुन् ।

आर्मी एएफसी कप होडबाट बाहिर

थ्री स्टारसंग गोलरहित बराबरी खेलेपछि आर्मी एएफसी कप छनोट खेल्ने होडबाट बाहिरिएको छ । क्लब लाइसेन्स पाएकामध्ये सातौं चरणको समाप्तीमा धेरै अंक जोड्ने क्लब २०२२ को एएफसी कपको प्रारम्भिक चरणमा छनोट हुने प्रावधान छ ।

अघिल्लो खेलमा साविक विजेता मछिन्द्रले मनाङलाई पराजित गरेपछि आर्मीका लागि पनि अवसर थियो । क्लब लाइसेन्स पाएका चारमध्ये मछिन्द्र र मनाङसंगै आर्मीपनि होडमा थियो । तर थ्रीस्टारसंग बराबरीपछि आर्मी होडबाट बाहिरियो । ६ खेलबाट १० अंक मात्र जोडेको आर्मी शीर्ष स्थानको मछिन्द्र भन्दा ४ अंकले पछि छ । अब एपीएफ विरुद्ध हुने खेल जितेपनि आर्मीले मछिन्द्रलाई भेट्ने छैन ।

थ्री स्टार ४ खेलमा शून्य गोल

लिग सुरु हुनुअघि थ्रीस्टारका प्रशिक्षक उर्जन श्रेष्ठले उपाधि जित्नका लागि खेल्ने लक्ष्य सुनाएका थिए । पहिलो खेलमा छिमेकी च्यासललाई ३-० ले हराएर थ्रीस्टारले त्यसको छनक पनि देखायो । तर त्यसपछि भने थ्रीस्टारले लय गुमायो । दोस्रो खेलमै नवप्रवेशी सातदोबाटोसंग पराजित भएको थ्रीस्टारले ६ मध्ये ४ खेलमा गोल गर्न सकेको छैन ।

पछिल्लो तीन खेलमा थ्री स्टारले लगातार गोलरहित बराबरी खेल्दा गोल गर्न सकेको छैन । तेस्रो खेलमा फ्रेण्ड्ससंग १-१ को बराबरी खेलेको थ्रीस्टारले त्यसयता एपीएफ, एनआरटी र आर्मीसंग गोलरहित बराबरी खेल्यो । अहिलेसम्म चार खेलमा क्लिनसिट राखेपनि थ्री स्टारले चार खेलमा गोल गर्न सकेको छैन ।

जितको खोजीमै फ्रेण्ड्स

फ्रेण्ड्स क्लब छैटौं चरण सकिँदासम्म पनि जितविहीन छ र जित्न बाँकी एक मात्र टोली छ । छैटौं चरणको खेलमा फ्रेण्ड्सले नेपाल पुलिसंग गोलरहित बराबरी खेल्दै अंक बाँड्यो । फ्रेण्ड्स दुई खेलमा सुरुवाती अग्रता लिएर पनि जोगाउन नसक्दा अंक गुमायो । संकटासंग अग्रता लिएर पनि हारेको फ्रेण्ड्सले थ्रीस्टारसंग अग्रता लिएर पनि बराबरी खेल्नुपर्‍यो ।

प्रशिक्षक मृगेन्द्र मिश्रले हरेक खेल महत्वपूर्ण हुने बताउँदै आएपनि फ्रेण्ड्सले जित्न सकेको छैन । लिगअघि नै रेलिगेसनबाट बच्ने पहिलो लक्ष्य राखेको फ्रेण्ड्स लिग जारी रहँदा रेलिगेसन क्षेत्रबाट माथि उठ्न संघर्ष गरिरहेको छ ।

विशालको लगातार ५ क्लिनसिट

साविक विजेता मछिन्द्रले लिगको पहिलो खेलमा एनआरटीलाई २-१ ले पराजित गर्दा सिजनको पहिलो गोल बेहोरेको थियो । छैटौं चरणसम्म अपराजित रहेको मछिन्द्रले त्यसयता भने गोल खाएको छैन । त्यसमा गोलकिपर विशाल श्रेष्ठले उत्कृष्ट प्रदर्शन गर्दै आएका छन् । उनले लगातार पाँच खेलमा क्लिनसिट राख्दै कुनै गोल हुन दिएका छैन । मछिन्द्रले यस सिजन लगातार ४८६ मिनेट गोल खाएको छैन ।

दोस्रो खेलमा आर्मीसंग गोलरहित बराबरी खेलेको मछिन्द्रले तेस्रो खेलमा जावलाखेल युथ क्लबलाई २-० र चौथो खेलमा हिमालयन शेर्पालाई ३-० ले हरायो । पाँचौं खेलमा संङ्कटासंग गोलरहित बराबरी खेलेको मछिन्द्रले छैटौं चरणमा मनाङ मर्स्याङ्दीलाई १-० ले नै हरायो ।

छैटौं चरणको खेलको नतिजा

एपीएफ ३-३ एनआरटी

पुलिस ०-० फ्रेण्ड्स

हिमालयन शेर्पा ३-१ च्यासल

मनाङ ०-० मछिन्द्र

संकटा ३-० ब्रिगेड

थ्रीस्टार ०-० आर्मी

सातदोबाटो ०-२ जावलाखेल

छैटौं चरणको खेलको गोलकर्ता

दर्शन गुरुङ, (२ गोल) एनआरटी

मेसुके ओलोमोउ, एनआरटी

आशिष लामा, एपीएफ