सुपारी आयात नखोल्न सरकारसँग किसानको माग

२७ पुस, काठमाडौं । झापाका किसानहरुले स्वदेशी माग धान्ने परिमाणमा सुपारी आफ्नै देशमा उत्पादन रहेको भन्दै आयात अनुमति नखोल्न सरकारको ध्यानाकर्षण गराएको छ ।

नमुना झापा सुपारी विकास संस्थाले एक ध्यानाकर्षण विज्ञप्ति जारी गर्दै सुपारी माफियाको दबावमा सुपारीको आयात खोले किसानहरु ठूलो मर्कामा पर्ने जनाएको छ ।

‘सरकार सुपारी माफियासंग मिलेर सुपारीको आयात खोले किसानहरु आफ्नो उत्पादन नबिकेर ठूलो मर्कामा पर्छन्,’ संस्थाले ध्यानाकर्षण पत्रमा भनेको छ, ‘आफ्नै देशको सुपारी नबिकेको बेला विदेशी सुपारी आयातको अनुमति दिनु किसान माथिको अपराध हो ।’ नेपालमा उत्पादन भएको सुपारी नबिकेको कारण किसानको घरमै थन्किएको पनि संस्थाले जनाएको छ ।

देशमा सुपारीको कुल खपत ९ देखि १० हजार मेट्रिकटन मात्रै रहेको र त्यो मागलाई धान्ने भन्दा ठूलो परिमाणको १२ हजार मेट्रिकटन सुपारी नबिकेर किसानको घरमा थन्किएको संस्थाले जनाएको छ ।