प्र्याङ्क भिडियोको विषयमा गृहमन्त्रालयको चेतावनी सकारात्मक : ओरेक

२० माघ, काठमाडौं । गृहमन्त्रालयले प्र्याङ्कको नाममा सर्वसाधारणलाई हैरानी दिनेगरी भिडियो खिचेर सामाजिक सञ्जालमा प्रकाशन गर्नेलाई कारबाही गर्ने भनी दिएको चेतावनीलाई महिला पुनर्स्थापना केन्द्र(ओरेक) ले स्वागत गरेको छ ।

प्र्याङ्कको नाममा सार्वजनिकस्थलमा महिलाहरूको शोषण भएको भन्दै ओरेकले गृह मन्त्रालयको कदमको स्वागत गरेको कार्यकारी निर्देशक लुभराज न्यौपानेले बताए ।

गृहमन्त्रालयले गत माघ १३ गते सार्वजनिक स्थलमा सम्बन्धित व्यक्तिको अनुमतिबिना प्र्याङ्क भिडियो खिचेर सामाजिक सञ्जालमा प्रकाशन गर्नेलाई कारबाही गर्ने चेतावनी दिएको हो । ओरेकले जारी गरेको विज्ञप्तिमा भनिएको छ,’प्र्याङ्कको नाममा सर्वसाधारण व्यक्तिहरूलाई मानसिक तथा शारीरिक रुपमा दिने सास्ती, हैरानी र सामाजिक सञ्जालमा उक्त गतिविधि प्रकाशन, प्रसारण गरी व्यक्तिको गोपनीयता र प्रतिष्ठामा पार्ने असरप्रति ध्यानाकर्षण भएकोमा उक्त पहललाई महिला पुनर्स्थापना केन्द्र (ओरेक) हार्दिक स्वागत गर्दछ ।’

साथै ओरेकले ३२१ महिला तथा किशोरीमा गरेको अध्ययनमा ४० प्रतिशतले सार्वजनिक यातायातमा आफूमाथि हिंसा भएको बताएका छन् । गृहले अन्य मन्त्रालयसँग समन्वय गरेर हिंसा अन्त्यका लागि नीतिगत पहल गर्नुपर्ने र विद्युतीय कारोबार ऐन २०६३ को प्रभावकारी कार्यान्वयन गर्नुपर्ने ओरेकले बताएको छ ।