टावरमा समस्या आएपछि गौतम बुद्ध अन्तर्राष्ट्रिय विमानस्थल बन्द

२१ माघ, बुटवल । टावरमा समस्या आएपछि भैरहवास्थित गौतम बुद्ध अन्तर्राष्ट्रिय विमानस्थल बन्द भएको छ ।

विमानस्थल नजिक चट्याङ परेका कारण टावरमा समस्या आएको विमानस्थलले जनाएको छ ।

शुक्रबार परेको वर्षा र हावासँगै विमानस्थल नजिकै चट्याङ परेको थियो । टावरमा समस्या देखिएपछि शुक्रबार दिउँसोदेखि विमानस्थल बन्द गरिएको विमानस्थलका महाप्रबन्धक गोविन्दप्रसाद दाहालले जानकारी दिए ।

चट्याङले टावरको तार चुँडिएको र रन वेको पिएपिआइ लाइट बिग्रेको कारण विमानस्थल बन्द गरिएको दाहालले बताए ।

पिएपिआइ लाइट बने शनिबार बिहानदेखि विमानस्थल सूचारु हुने अन्यथा भिओआर प्रविधिको प्रयोगबाट दिउँसो मात्र विमानस्थल सञ्चालनमा आउने दाहालले जानकारी दिए ।