एमसीसीको व्याख्यात्मक प्रस्तावको औचित्य छैन : प्रेम सुवाल

१५ फागुन, काठमाडौं । नेपाल मजदुर किसान पार्टीका सांसद प्रेम सुवालले एमसीसी सम्झौंता राष्ट्रघाती भएको उल्लेख गर्दै त्यसमा व्याख्यात्मक प्रस्तावको औचित्य नरहेको बताएका छन् ।

आईतबार प्रतिनिधिसभा बैठकमा एमसीसीमाथिको छलफलमा भाग लिँदै सांसद सुवालले एमसीसी सम्झौतामा व्याख्यात्मक प्रस्ताव स्वीकार नगर्ने अमेरिकाले स्पष्ट पारिसकेको पनि सत्तारुढ गठबन्धनलाई स्मरण गराए ।

उनले एमसीसी सैन्य मोर्चा भएको उल्लेख गर्दै त्यसमा आर्थिक वृद्धि र गरिवी अन्त्य गर्ने भनेर झुटो प्रावधान राखेको दावी गरे । सांसद सुवालले प्रधानमन्त्री देउवाले ‘विष सरह’ रहेको एमसीसीलाई सित्तैमा आउने अनुदान भनेर देश नै नरहने प्रस्ताव संसदमा पेश गरेको आरोप लगाए ।

उनले एमसीसीमा उल्लेख गरिएको कुनै पनि प्रावधान नेपालको हितमा नरहेको पटकपटक दोहोर्‍याए । एमसीसी नेपालका लागि ‘विष सरह’ रहेको र सो पिए नेपाल नै नरहने उनको भनाई थियो ।

‘एमसीसी भनेको सैन्य मोर्चा भएको स्पष्ट उल्लेख गरिएको छ । आर्थिक वृद्धि र गरिवी अन्त्य झुटो हो । यसकारण व्याख्यात्मक प्रस्तावको औचित्य छैन । यस्तो प्रस्ताव अमेरिकाले स्वीकार नगर्ने बताइसकेको छ । प्रधानमन्त्री देउवाजीले सित्तैमा आउने, किन नलिने तथा देशघाती कहाँ छ भन्नु भयो, सित्तैमा आएको विष पिए के होला ? मृत्यु हुन्छ अर्थात् देश रहँदैन ।’ सांसद सुवालले भने, ‘अमेरिकाको वर्तमान र भविष्यको कानुन उलंघन गर्न नपाउने र सम्झौताको अवधि पाँच वर्षपछि अनन्त कालसम्म पनि यसको व्यवस्था कायम रहने सम्झौतामा उल्लेख छ । ती व्यवस्था नेपालको हितमा छैनन् ।’

सांसद सुवालले एमसीसी संसदबाट पारित गरे नेपालमा हिंसा, युद्ध, भोक, रोग र मृत्यु मात्रै हात लाग्ने चेतावनीसमेत दिए ।