१८ फागुन, काठमाडौं । श्री भगवती क्लब र सरस्वती युथ क्लबले शहीद स्मारक बी डिभिजन लिगमा विजयी सुरुवात गरेका छन् । मंगलबार एन्फा कम्प्लेक्स सातदोबाटोमा भएको उद्घाटन खेलमा श्री भगवतीले झम्सिखेल युथ क्लबलाई ३-१ ले हरायो ।
श्री भगवतीका लागि अनिल गुरुङले २४औं, रुमेश उरावले ५०औं र मिलन खड्काले ६३औं मिनेटमा गोल गरे । झम्सिखेलका लागि मानकुमार राईले ३७औं मिनेटमा एक गोल फर्काएका थिए ।
यस्तै, मंगलबार भएको दोस्रो खेलमा सरस्वतीले बाँसबारी युथ क्लबलाई ३-१ ले नै हरायो । सरस्वतीले एक गोलले पछि परेको अवस्थामा पुनरागमन जित निकालेको हो ।
खेलको छैटौं मिनेटमै बिक्की राईले गोल गर्दै बाँसबारीलाई अग्रता दिलाएका थिए । तर लामो समय अग्रता टिकेन । २१औं मिनेटमा सरस्वतीका बिक्रमले गोल गर्दै खेललाई १-१ को बराबरीमा ल्याए ।
सृजल लामाले खेलको ८७औं मिनेटमा गोल गरेपछि सरस्वतीले २-१ को अग्रता लियो । त्यसपछि इन्जुरी टाइममा भुपेन्द्र शाहीले गोल गर्दै सरस्वतीलाई ३-१ को जित दिलाए ।
प्रतिक्रिया 4