युवा संघको व्यंग्य : फर्सीमा अर्थमन्त्रीको तस्वीर

२७ चैत, काठमाडौं । नेकपा एमाले निकट राष्ट्रिय युवा संघ नेपालले अर्थमन्त्री जनार्दन शर्माविरुद्ध व्यंग्यात्मक शैलीमा विरोध प्रदर्शन गरेको छ ।

कुर्सीमाथि फर्सी, फर्सीमा अर्थमन्त्री शर्माको तस्वीर बनाएर व्यंग्यात्मक शैलीमा उनीहरुले आइतबार काठमाडौंको नयाँ बानेश्वरमा विरोध प्रदर्शन गरेका हुन् ।

विरोध प्रदर्शनलाई सम्बोधन गर्दै संघका अध्यक्ष तथा एमालेका केन्द्रीय सदस्य किरण पौडेलले अर्थमन्त्री शर्मालाई जेल सजाय हुनुपर्ने भन्दै विरोध जनाए ।

‘मुलुक भवाभह आर्थिक संकटमा गुज्रिरहेको समयमा आफ्ना अनुचित दबाब पालना नगरेका कारण नेपाल राष्ट्र बैंकका गभर्नरलाई अर्थमन्त्रीले निलम्बन गर्नु भएको छ । यसले बढ्दो संकटपूर्ण अवस्थामा विश्वभर नकारात्मक सन्देश प्रवाह गर्ने हुँदा यो गम्भीर अपराध हो,’  पौडेलले भने, ‘त्यसैले अर्थमन्त्रीलाई पदमुक्त मात्र होइन, जेल सजाय नै हुनुपर्छ ।’

अध्यक्ष पौडेलले वर्तमान सरकारको नालायकीपनविरुद्ध कडा प्रतिवादमा उत्रन युवाहरू समक्ष आह्वान समेत गरे ।

यो पनि पढ्नुहोस

सरकारमाथि एमालेको आरोप : असफलता ढाक्न गभर्नर निलम्बन (पूर्णपाठ)