कैलालीमा कांग्रेसका ५७ जना नेता कार्यकर्ताले पार्टी छाडे

१५ वैशाख, धनगढी । कैलालीमा नेपाली कांग्रेसका ५७ जनाले राजीनामा दिएका छन् । २०७४ सालको स्थानीय निर्वाचनमा धनगढी उपमहानगरपालिका–४ का वडाध्यक्षमा निर्वाचित दिपक थापासहितका ५७ जना कार्यकर्ताले बिहीबार सामूहिक राजीनामा दिएका हुन् ।

धनगढीमा पत्रकार सम्मलेन गर्दै थापासहित पूर्व वडा सभापति अनन्तराज जोशी, छत्र बडेलालगायतका स्थानीय नेता, कार्यकर्ताले राजीनामा दिएको घोषणा गरे ।

वडाध्यक्षको टिकट वितरणमा असन्तुष्टि जनाउँदै आएका थापाले अघिल्लो निर्वाचनमा बागी उम्मेदवारी दिएका बुद्धि खड्कालाई टिकट दिएकाले क्रियाशिल सदस्य समेत नरहनेगरि सामूहिक राजीनामा दिएको बताए । थापाले खड्काविरुद्ध वडाध्यक्षमा बागी उम्मेदवारी दिएका छन् ।