१० असार, काठमाडौं । अखिल नेपाल फुटबल संघ (एन्फा)को नवनिर्वाचित कार्यसमितिको पहिलो बैठकले विदेश विभागको प्रमुखमा नवीन पाण्डेलाई नियुक्त गरेकोमा आलोचना भइरहेको छ ।
एन्फा विधानको हवाला दिएर विदेशी नागरिकलाई फुटबलको विदेश विभाग प्रमुखको जिम्मेवारी दिँदा स्वार्थ बाझिनसक्ने आशंका गरिएका छन् । एन्फा विधानमा एन्फा, प्रदेश फुटबल संघ र जिल्ला फुटबल संघमा निर्वाचित वा मनोनित हुन नपाउने व्यवस्थाको पहिलो नम्बरमै ‘गैरनेपाली नागरिक’ भन्ने उल्लेख छ ।
त्यसकै आधारमा जर्मन नागरिक पाण्डेको नियुक्तिमा विरोध भएको हो । तर सोही बैठकबाट महासचिव नियुक्त भएका किरण राईले भने स्वयमसेवक जिम्मेवारी भएको हुनाले आफूहरुले विधान विपरीत हुने गरी कुनै काम नगरेको दाबी गरे । उनले यो विषयलाई धेरै उछाल्नु अर्थहीन हुने बताए ।
‘यहाँनेर थोरै भ्रम भएजस्तो लाग्यो । एन्फाको विधानमा गैरनेपाली नागरिक एन्फाको केन्द्रीय, प्रादेशिक र जिल्ला फुटबल संघको कार्यसमितिमा निर्वाचित वा मनोनित हुन नपाउने भनिएको,’ राईले अनलाइनखबरसँग भने, ‘नवीन पाण्डेलाई हामीले विदेश विभाग विज्ञका रुपमा नियुक्त गरेका हौं । विदेशी प्रशिक्षक र विज्ञहरु नियुक्ति गरेजस्तै हो उहाँको नियुक्ति ।’
त्यसो भए विज्ञ र विदेशी प्रशिक्षक नियुक्ति गर्दाजस्तै पाण्डेको नियुक्ति पनि सार्वजनिक सूचनासहित खुला प्रतिस्पर्धात्मक विधिबाट किन भएन ? भन्ने प्रश्न उठ्छ ।
अघिल्लो कार्यसमितिका प्रवक्तासमेत रहेका महासचिव राई भन्छन्, ‘विदेशी प्रशिक्षक र विज्ञ नियुक्ति गर्दा आर्थिक कारोबार मुख्य विषय हुन्छ । त्यसैले त्यसको प्रक्रिया अलग हुने भयो । हामीले हाम्रो आवश्यकताअनुसार स्वयमसेवकका रुपमा विदेश विभागमा पाण्डेको सहयोग लिने निर्णय गरेका हौं ।’
विदेश विभाग प्रमुखका रुपमा पाण्डेको नियुक्ति विवादमा तानिएको यो दोस्रोपल्ट हो । यसअघि अघिल्लो कार्यसमितिमा पनि कर्मा छिरिङ शेर्पाले आफू निर्वाचित भएलगत्तै उनलाई विदेश विभागसहित आफ्नो प्रमुख सल्लाहकारमा नियुक्त गरेका थिए ।
शेर्पाले आफ्नो सल्लाह कार्यान्वयन नगरेको भन्दै असन्तुष्टी सुरु भएपछि नियुक्तिको ८ महिनामै उनले दुवै पदबार राजीनामा दिएका थिए । विदेश विभाग प्रमुख बनेका पाण्डेले पंकज विक्रम नेम्वाङको चुनावी अभियानका मुख्य रणनीतिकारको भूमिका निभाएका थिए ।
Results
यो खबर पढेर तपाईलाई कस्तो महसुस भयो ?
खुसी
दुःखी
अचम्मित
उत्साहित
आक्रोशित
प्रतिक्रिया
Hot Properties
प्रतिक्रिया 4