अब के हुन्छ सन्दीपविरुद्ध परेको जाहेरीको प्रक्रिया ?

२२ भदौ, काठमाडौं । राष्ट्रिय क्रिकेट टोलीका कप्तान सन्दीप लामिछाने क्याराबियन पि्रमियर लिग -सीपीएल) क्रिकेट खेल्नका लागि अहिले जमैकामा छन् ।

मंगलबार उनीविरुद्ध प्रहरी वृत्त गौशालामा जबरजस्ती करणीको कसूरमा किटानी जाहेरी दर्ता भएको छ ।

१७ वर्षकी पीडित किशोरीले मंगलबार लामिछानेविरुद्ध प्रहरी वृत्त, गौशालामा दिएको किटानी जाहेरीमा आफूलाई ५ भदौको राति ११ः५५ बजे पिंगलास्थानस्थित होटल काठमाडौं इनको कोठा नम्बर ३०५ मा लगेर पटकपटक बलात्कार गरिएको उल्लेख गरेकी छन् ।

जाहेरी पर्ने वित्तिकै प्रारम्भिक सोधपुछ गरेर पीडितलाई स्वास्थ्य जाँचका लागि प्रसुति गृह थापाथली पठाइएको थियो ।

प्रहरीले अहिले होस्टल नजिक भनिएको स्थान, नगरकोट र पिंगालास्थानमा उनीहरु गएको स्थानको क्लोज सर्किट (सीसी) क्यामरा फुटेज संकलन गर्न थालेको छ ।

लामिछाने र पीडित भनिएकी किशोरी गएका बेला कार्यरत कर्मचारीसँग पनि प्रहरीले बयान लिनेछ । प्राविधिक पक्षको विश्लेषणबाट उनीहरुबीच त्यसबेला टेलिफोन कुराकानी भएको थियो थिएन भन्ने पनि प्रहरी निकाल्नेछ ।

उनीहरुबीच सामाजिक सञ्जाल स्न्यापच्याट र हृवाट्स एपमार्फत कुराकानी हुने गरेको पीडितको भनाइ छ । स्न्यापच्याटमा संवाद पठाएको हेर्ने वित्तिकै आफैं डिलिट हुन्छ ।

प्रहरीले तत्काल फेला पर्ने प्रमाणका आधारमा लामिछानेविरुद्ध अदालतबाट पक्राउ अनुमति लिने तयारी गरेको छ । त्यसपछि अनुसन्धानको थप प्रक्रिया अघि बढ्नेछ ।

लामिछाने भने देश बाहिर छन् ।

प्रहरीका अनुसार उनी नेपाल फर्किएको अवस्थामा त्रिभुवन अन्तर्राष्ट्रिय विमानस्थलबाटै पक्राउ पर्नेछन् । यसका लागि काठमाडौं प्रहरीले त्रिभुवन अन्तर्राष्ट्रिय विमानस्थल सुरक्षा कार्यालयलाई पत्राचार गर्ने तयारी गरेको छ ।

यपद उनी स्थलमार्गबाट आए भने पनि जुनसुकै स्थानमा पक्राउ पर्नसक्ने अवस्था रहन्छ । यदि अनुसन्धान अधिकृतसँग समन्वय गरे र प्रहरीले पनि सहजिकरण गरिदिए उनले आफैं आत्मसमर्पण गर्नसक्ने अवस्था पनि रहन्छ ।

उनी नेपाल नआएको अवस्थामा जिल्ला प्रहरी परिसर, काठमाडौंले अन्तर्राष्ट्रिय अपराध प्रहरी संगठन (इन्टरपोल) को सहयोग लिनसक्ने एक अनुसन्धान अधिकृत बताउँछन् ।

यो पनि पढ्नुहोस

सन्दीप लामिछानेविरुद्ध अभियोग पुष्टि भए बलात्कारमा १२ वर्षसम्म जेल सजाय हुनसक्ने

लामिछानेमाथि लागेको अभियोगबारे उल्लेख गरेर काठमाडौं प्रहरीले डिफ्युजन नोटिस जारी गरिदिन भन्दै नेश्नल कन्ट्रोल ब्यूरो (एनसीबी) लाई पत्राचार गर्नेछ । त्यसपछि नोटिस जारी हुने प्रक्रिया अघि बढ्नेछ ।

इन्टरपोलमा नोटिस जारी गरेपछि जुनसुकै देशको विमानस्थलमा पक्राउ पर्नसक्छन् ।

तर तीन वर्षसम्म पनि उनी पक्राउ परेनन् र अदालतमा हाजिर भएनन् भने प्रहरीले अदालतमा फाइल बुझाउनेछ । किनकी मुलुकी अपराध संहितामा हालै भएको संशोधनले नाबालिगको बलात्कारमा तीन वर्षका हदम्याद राखेको छ ।

प्रहरीले मुद्दा अदालतमा बुझाएपछि सन्दीपले अदालतमा हाजिर भएर आफ्नो सफाइ पेश गर्नुपर्ने हुन्छ।

यो पनि पढ्नुहोस

सन्दीपमाथि लागेको आरोपबारे प्रहरी : पृष्ठभूमि हेरिन्न, संवेदनशील भएर अनुसन्धान हुन्छ